Cursu d'Asturianu nel CAM

El Centru Asturianu de Madrid entama per segundu añu consecutivu los Cursos de Llingua Asturiana empobinaos a tolos interesaos na conocencia o afondamientu de la llingua propia d'Asturies y abiertos a tol mundu. A resultes de l'aceptación de los cursos del otru añu, que dio Xaviel Vilareyo, esta vegada el mesmu profesor va encargase de dar dos niveles, d'aniciu y superior. Les clases tendrán llugar los martes, miércoles y xueves de 7 a 9 la tarde nel llar cel centru (cai Farmacia 2, metru Tribunal). La matrícula ye dafechu gratuíta y el cursu desenrollaráse dende febreru a mayu con una duración de 60 hores lectives, recibiendo los asistentes diploma acreditativu de l'Academia de la Llingua Asturiana. P'apuntase hai que llamar a los teléfonos del Centru 91 532 82 81 o 91 532 82 45. Los responsables del Centru cuenten con qu'esti añu les instituciones públiques asturianes y el Conseyu de Comunidaes Asturianes apoyen decididamente esti tipu d'iniciatives culturales, yá seya con perres o unviando material didácticu. El Conseyu de Comunidaes Asturianes nun apoya económicamente los Cursos de Llingua Asturiana pel momentu pero sí sufraga el premiu de Lliteratura n'asturianu del Centru con 1500 euros. Pola contra el Centru Vascu en Madrid, por poner un casu, recibe del so gobiernu autónomu unos 18.000 euros por poner clas de llingua vasca.