Curriculum asturianu

Según anunció esti día'l Conseyeru d'Educación y Cultura, nel curriculum pal cursu que vien qu'ellabora'l Principáu pa Secundaria y Bachilleratu, incluyiráse l'estudiu de les "peculiaridaes asturianes, les señes d'identidá, el patrimoniu históricu, artísticu, industrial y llingüísticu". Esta ye la primer vez que'l Principáu diseña directamente los planes d'estudiu de los escolares asturianos depués del trespasu de les competencies educatives. Nesti sen, el Conseyeru Fernández Vallina diz qu'esta ye una propuesta xeneral abierta a los ámbitos políticos, sindicales, de padres d'alumnos y a la sociedá en xeneral, de los qu'espera suxerencies pa "arriquecer" el proyectu. El plazu pa recibir estes propuestes pesllaríase'l 25 de febreru, en palabres del pa dar tiempu a redactalu con tiempu pal entamu del cursu en setiembre.
Esti plan d'estudios, que contempla otres midíes como l'aumentu d'horariu en dos hores selmanales, la tecnoloxía o l'atención a la diversidá, dizque va durar diez años polo menos y va aplicase'l cursu que vien en primeru y terceru de ESO y en primeru de Bachilleratu, p'abarcar los demás cursos l'añu que vien.
En palabres de Fernández Vallina, "búscase una ensiñanza compatible y comprensiva" que se adapte al orixe cultural del escolar", polo que supónse que'l aspectu llingüísticu sería perimportante.
De toles maneres y viendo los resultaos en Primaria y les amenaces del MEC (ver noticies anteriores) esto que paez una bona noticia, podía quedar en poca cosa viendo lo probe de la llexislación qu'ampara los derechos llingüísticos y la voluntá política demostrada polos responsables asturianos hasta agora. Siguimos, nun mos engañemos, falando de "voluntariedá", porque lo que propón el Conseyeru ye, en palabres propies "facer cumplir en tolos centros públicos y concertaos d'Asturies la obligatoriedá de proponer estudios n'asturianu pa los alumnos que voluntariamente lo decidan". Ta por ver si, como paez, esta voluntariedá va aplicase namás pa l'asignatura d'asturianu, pero non pa la conocencia de la "cultura asturiana", lo que ye señal de más de lo mesmo, como manifestaron los sindicatos de la ensiñanza asturianos depués de tener una xunta col Director Xeneral Ríopedre sobre l'asuntu.

Contador Estadistiques