Cúmplense dos años desque la FSA-PSOE asumió la oficialidá

La consecuencia más visible ye l'ascensu de Berta Piñán a la Conseyería de Cultura.

Foi un 1 d'ochobre del 2017 cuando'l Plenariu del 32 Congresu de la FSA-PSOE aprobara defender la oficialidá del asturianu nuna próxima reforma estatutaria. Anque la iniciativa saliera aprobada por un estrenchu marxe na comisión sectorial na que se trató, el 80 por cientu de los delegaos aprobárenla al otru día na votación xeneral sobre los nuevos derechos sociales qu'asumía defender la FSA. Previamente, esta reivindicación aportara sofitada pola mayor parte de les agrupaciones locales. A partir d'ehí, magar dalgunos globos sonda de destacaos militantes de la guardia vieya con importantes sofitos mediáticos, la dirección nueva defendió la midida siempres que-y preguntaben por ella.

Anque con una redacción abondo ambigua, la propuesta de reconocencia de la oficialidá pal asturianu y el gallego-asturiano pasó a formar parte del programa electoral col que los socialistes ganaron les eleiciones de mayu del 2019, esperimentando amás una espectacular xubida respeutu a los anteriores comicios. D'esta manera, igual que-y pasara a IX nel 1995 y a Podemos nel 2015, otra vez una formación política meyoraba los sos resultaos, magar llevar la oficialidá nel programa. Magar la xuba de la FSA y, en xeneral, del sofitu a la oficialidá que, pola primer vez, encontó una mayoría bien amplia de ciudadanos -absoluta en términos parllamentarios– el resultáu final nun dio pa pesllar una reforma estatutaria qu'incluya da-y el máximu rangu llegal a la llingua. Les organizaciones partidaries, sicasí, comprometiéronse en siguir trabayando pa sumar a más fuercies al consensu pola oficialidá.

D'otramiente, l'efectu más visible del xiru de la FSA nel congresu d'hai dos años foi l'usu del asturianu por parte del residente nos sos discursos oficiales –Alderique d'Investidura, Toma de Posesión, Día d'Asturies– y, tamién, la designación de la escritora Berta Piñán, figura destacada de la segunda xeneración del Surdimientu, como conseyera de Cultura, Política Lligüística y Turismu.

La docente y escritora completó depués el so organigrama con nomes destacaos de la reivindicación llingüística como Antón García, Martín López-Vega o Ana Vannesa Gutiérrez. El decretu d'estructuración de la conseyería especificaba amás que la misión d'esi departamentu, del de Cultura y Política Llingúística, diba ser normalizar l'asturianu y el gallego-asturiano, cuando hasta agora quedaba nel estatutariu "promover".

Hai que recordar que Javier Fernández yá nomara a una persona favoratible a la oficialidá en 2015, Genaro Alonso, anque esta designación interpretóse daquella como un guiñu a IU, cola qu'acababen de roblar un alcuerdu d'Investidura. La escoyeta de Piñán, sicasí, parez ser más bien consecuencia del xiru asturianista de la FSA nel so caberu Congresu. Falta agora por ver qué eficacia práctica van tener toos estos xestos, una y buenes, por exemplu, del papel de la RTPA nada se sabe. De mano, nun ye un bon síntoma la inauguración d'un portal web del departamentu de Turismu, que tamién depende de Piñán, ninguna de les llingües d'Asturies ta presente. Anque lo más normal ye que, viendo les altures del añu nel que se fai públicu, viniera yá contratáu asina de l'anterior Alministración.

Na imaxe, Piñán, xunto col presidente Adrián Barbón na Feria Internacional de Muestres d'Asturies (FIDMA) nun de los sos primeros actos públicos como conseyera. Semeya obra d'Armando Álvarez.