Cúmplense diez años de la Declaración sobre los Derechos de los Pueblos Indíxenes

El 13 de setiembre del 2007 l'Asamblea Xeneral de les Naciones Xuníes aprobóla. Un actu va conmemorala n'Uviéu.

Compuesta por 46 artículos, la Declaración de les Naciones Xuníes sobre los Derechos de los Pueblos Indíxenes salió alantre con 144 votos a favor, 4 en contra (Estaos Xuníos, Australia, Canadá y Nueva Zelanda), 11 astenciones y 34 ausencies. Nestos diez años, Australia, Nueva Zelanda, Canadá, Estaos Xuníos, Colombia y Samoa rectificaron la so posición inicial y sumáronse a la mesma.

Ente los puntos que trata destaquen los derechos coleutivos, los derechos culturales y la identidá, y los derechos a la salú, la educación y l'emplegu, entre otros. Tamién afonda nel derechu de los pueblos indíxenes de caltener y fortalecer les so propies instituciones, cultures y tradiciones, y de trabayar pol so desarrollu d'alcuerdu a les sos aspiraciones y necesidaes.

Mañana, la Coordinadora d'ONGD del Principaú d'Asturies (CODOPA) entama un actu n'Uviéu pa conmemorar esti pasu dau hai diez años que nun foi una solución definitiva, yá que los derechos de los pueblos indíxenes siguen incumpliéndose. Va ser al meudía nel parque Ismael Fuentes y nél va presentase'l CD 'Me acuerdo del agua', n'homenaxe a Berta Cáceres, persona que cuenta con una placa nel llugar, y que va ser interpretáu en direuto por Anabel Santiago y Julio Arbesú.

Na semeya, muyeres de la etnia emberá nun desfile en Panamá. Obra d'Ayaita baxo llicencia CC BY 3.0.