Cultura va restaurar les pintures murales de dellos edificios prerrománicos

El conseyeru Genaro Alonso anunció la puesta en marcha d'un proyeutu de restauración de pintures murales de dellos templos prerrománicos, ente ellos Santuyano. "Ye un oxetivu irrenunciable, amás d’urxente, dau l’estáu de dalgunes d’elles”, indicó.

El responsable d'Educación y Cultura, que participó na inauguración del Foru Xuvenil del Patrimoniu Mundial, recordó que los últimos trés años supunxeron un impulsu notable na recuperación del prerrománicu asturianu, con intervenciones integrales na Cámara Santa, Santa Cristina de Ḷḷena y Santu Adrianu de Tuñón. “Agora toca’l saltu al interior. Ta claro qu’ún de los proyeutos y oxetivos irrenunciables y inmediatos va ser encarar la restauración de les pintures de Santuyano y d’otros templos d’Asturies. Ye un oxetivu irrenunciable, amás d’urxente, dau l’estáu de dalgunes d’elles”, señaló.

Alonso tamién valoró la importancia de la educación patrimonial empobinada a la mocedá. Nesti sen, aseguró que la potencialidá del prerrománicu ye enorme y tien que s’aprovechar pa xenerar productos educativos de calidá pa tolos públicos.

“Esti foru xuvenil axunta educación y patrimoniu y pa nós el fechu de que vengan conocelu y tenga un espardimientu posterior nos países onde vuelven estos visitantes ye importante porque l’actividá nun remata cola visita, yá qu'ellos nel so foru tienen una partida d’actividaes de recoyida, puesta de común, valoración, qu’ayuden al espardimientu y conocencia del nuestru patrimoniu fuera d’Asturies. Por eso, tamos encantaos de qu’escoyeren Asturies”, señaló.

Al respeutive del patrimoniu industrial asturianu, el conseyeru apuntó que conforma la idiosincrasia d’un pueblu, nesti casu l’asturianu, qu’ayuda a conocer meyor la so historia y polo tanto tamién a valoralu y caltenelu nel futuru.

Na semeya, Alonso xunto col vicariu xeneral del Arzobispáu d'Uviéu, Jorge Sangrador; y la subdirectora xeneral axunta de Proteición del Patrimoniu del Ministeriu d'Educación, Cultura y Deporte, Esther Rodríguez García, na inauguración del Foru Xuvenil del Patrimoniu Mundial.