Cultura va restaurar horros y paneres centenaries de relevancia histórica, artística y patrimonial

Emilio Marcos Vallaure anunció que la so conseyería va encargase de restaurar horros y paneres de relevancia histórica, artística y patrimonial. Quirós va acoyer les primeres actuaciones en construcciones de los sieglos XVI y XVII.
 
Mentes una visita a esti conceyu, Marcos Vallaure, que tuvo acompañáu pol direutor xeneral de Patrimoniu Cultural, Juaco López, y l'alcalde, Ovidio García, aseguró que Cultura y Deporte va encargase de manera direuta de restaurar y iguar horros del sieglu XVI y paneres del XVII de Quirós. El conseyeru, que recordó que l'Alministración anterior "nun aportó nin un solu euru de los presupuestos autonómicos del 2011 al arreglu d'horros", apostó por cavilar sobre la política de subvenciones a particulares que se desarrolló nes trés décades últimes. "Desgraciadamente, la política de subvenciones nun detuvo la desapaición d'horros y paneres de muncho interés; de construcciones de los sieglos XVI y XVII, delles profusamente decoraes. Nós podemos restaurar los elementos más destacaos, pero precisamos tamién un compromisu de los propietarios pa qu'autoricen el desarrollu de los llabores de caltenimientu", señaló’l responsable de Cultura.
 
Según informó l'Executivu, la conseyería va entamar a aplicar esta política de forma seleutiva nel 2012 nuna serie d'horros del conceyu de Quirós. Amás, les restauraciones van tar vinculaes al ámbitu d'actuación del Muséu Etnográficu de Quirós, encargáu de la divulgación y espardimientu d'estes construcciones. La Direición Xeneral de Patrimoniu Cultural d'Asturies prepara, coles mesmes, un estudiu de los primeros horros y paneres que se caltienen nel país pa integralo nuna base de datos del inventariu únicu del patrimoniu cultural asturianu.