Cultura va escavar les mines del Aramu

El Conseyu de gobiernu d'Asturies aprobó na so xunta d'esta mañana la creación d'un conveniu cola Universidá d'Uviéu pa escavar les antigües mines de cobre del Aramu, en conceyu de Riosa y que daten del añu 3.500 enantes de Cristo

Asitiaes nel sureste de la Cordal del Aramu, na fastera que baxa pa contra Riosa a una altitú de cerca de 1300 metros sobre'l nivel del mar, les mines del Aramu tienen una esplotación na dómina contemporánea, na que les fasteres de la cordal del Aramu y del Monsacro dieron bien de cobaltu, cobre y carbón hasta mediaos del sieglu XX, pero ello ye que muncho enantes de la revolución industrial, les vetes de mineral yá s'aprovechaben pola mano humana, como descubrieron nel añu 1888 los inxenierios belgues y holandeses que trabayaben pa Fábrica de Mieres encabezaos pol holandés Van Straalen, director de Fábrica de Mieres, y el belga Alfons Dory.

Tres de filones que-y pudieren servir a la industria moderna, los inxenieros decimonónicos llevaron una sorpresa cola que nun contaben al alcontrar vetes de cobre que presentaben señes de que yá se trabayaben na Edá de Bronce. L'afayu de los inxenieros confirmóse cuando atoparon el pozu de la mina prehistórica, nel que s'alcontraron bien de restos humanos, dellos col preséu de trabayu garráu nes manes, señal de que morrieren n'accidente.

Yá nel sieglu XX, el profesor de la Universidá d'Uviéu Miguel Angel de Blas Cortina retomó la investigación con una intensa campaña d'escavación arqueolóxica, completando'l descubrimientu de bien de restos humanos y preseos de los llabores mineros y metalúrxicos y iguando la datación de les esplotaciones. Los llabores de datación asitiaron la esplotació de les mines del Aramu a mediaos del tercer mileniu enantes de la nuestra era, conseñándose la so importancia como unes de les más interesantes de tola minería prehistórica europea. El proyectu acabante d'aprobase tendrá d'afondar nel conocimientu d'esta parte de la nuestra historia.