Cultura trabaya na ellaboración d’una Llei de Museos

El conseyeru d’Educación y Cultura anunció esti xueves na Xunta Xeneral la creación d’una Llei de Museos p’adaptar la normativa a les necesidaes culturales d’anguaño. Genaro Alonso tamién ratificó qu’esti añu nun va convocar oposiciones docentes pese al demandáu decretu llei del ministeriu, que va aprobase'l día 31.

Nel mes de payares, según apuntó tres una intervención del diputáu popular Pedro de Rueda –que demandaba una llei que cumpliera’l compromisu socialista del 2003 d’una normativa y que criticó la política del Gobiernu pa colos museos, ensin planificación nenguna p’aprovechar la so rentabilidá, según les sos pallabres–, rematóse la redaición d’un borrador d’anteproyeutu, fechu por personal del Serviciu de Promoción Cultural, Archivos, Museos y Biblioteques, en collaboración col de Patrimoniu Cultural y los direutores del Muséu de Belles Artes, el Muséu Barjola y el Muséu Arqueolóxicu. Ésti recueye les previsiones contemplaes na Llei de Patrimoniu Cultural tocante a la consideración de funciones propies de los museos: la investigación, proteición, espardimientu y puesta al serviciu del públicu de los bienes del patrimoniu asturianu que tien de recoyese n’instituciones d’esta mena.

El documentu, dixo Alonso, fai mención tamién al establecimientu d’un sistema nacional pa la coordinación ente los centros y la meyora de los sos servicios. Paralelamente a los trabayos de redaición de la llei, el conseyeru manifestó que “se consideró necesario constituyir una comisión téunica d’espertos, onde tán representaos tanto responsables d’equipamientos museísticos de distinta tipoloxía como especialistes de sonadía de la Universidá d’Uviéu”.

Tamién destacó la pretensión de regular, amás de los museos, les coleiciones museográfiques y los centros d’interpretación del patrimoniu cultural, toos ellos baxo la denominación de centros museísticos. El borrador d’anteproyeutu inclúi la creación d’un sistema d’estos equipamientos, pa la meyora conxunta en cuestiones de xestión, servicios y recursos, y regula el réxime xurídicu y financieru de los centros museísticos, el procedimientu pa la creación y calificación d’un muséu o una coleición museográfica, sía como quiera la so titularidá, y les consecuencies que d’ello se deriven.

Alonso recordó que pa la ellaboración d’esti primer documentu nel procesu de redaición de la llei tuviéronse en cuenta les normatives d’otres comunidaes autónomes, concretamente les d’Euskadi, Navarra, Andalucía, Castilla y Lleón y Castilla-La Mancha. La Llei de Museos d’Asturies xustifícase en que “la esperiencia atesorada aconseya yá l’establecimientu d’un marcu normativu qu’encare la configuración nueva de los centros museísticos nos aspectos téunicu y xurídicu”, aseguró’l conseyeru.

Nun hai cambios con respeuto a les oposiciones

L’anuncia de l’aprobación d’un real decretu llei por parte del ministru d’Eduacación, Cultura y Deporte, Íñigo Méndez de Vigo, pa que les comunidaes autónomes puedan convocar oposiciones docentes ensin esperar l’aprobación de los Presupuestos nes Cortes nun va camudar la postura d’Asturies, que yá refugó’l so entamu pese a que nun primer momentu les tenía previstes. “Qu’haya o nun haya decretu nun va modificar la nuesa decisión”, sentenció Alonso.

“Sigo pensando que’l ministeriu y el Gobiernu d’España tomaron como rehenes a les comunidaes autónomes pa presionar pol tema de presupuestos. Paeznos una forma de proceder poco correuta y mui poco collaboradora a nivel institucional, por respetu a les comunidaes autónomes y a los aspirantes”, apuntó. El conseyeru manexa l’añu 2019 pa la convocatoria de les oposiciones docentes a Primaria y Infantil.