Cultura reduz la partida pa política llingüística nun 14 por cientu, anque amplía l’asignación a l’ALLA

Ana González, conseyera d’Educación, Cultura y Deporte, esplicó na Comisión de Facienda de la Xunta Xeneral les cuentes del so departamentu. La partida pa política llingüística sufre un recorte nuevu importante que criticó Foro con dureza.

Les perres destinaes al idioma del país van superar los 1,7 millones d’euros, polos 2,1 que destinó’l Gobiernu de Foro Asturias Ciudadano nel 2012, cuando’l descensu de la partida pa política llingüística foi del 24 por cientu en comparanza col añu anterior. Ello supón una mengua del 38 por cientu en dos años. Según esplicó González na so intervención, l’Academia de la Llingua Asturiana (ALLA), que l’añu pasáu sufrió un recorte del 40 por cientu nel so presupuestu al pasar de 230.000 euros nel 2011 a 134.320, va ver aumentada nesta ocasión la so partida. Pese a que la conseyera afirmó que se salven les llinies principales d’actuación, van desapaecer les subvenciones pa empreses y asociaciones pol usu de la llingua asturiana.

No que se refier a les cuentes totales de la conseyería, que nesta etapa nueva col PSOE incorpora tamién a Educación, éstes van ser un 9,70 por cientu menor: 757.610.061 euros, de los que 700.572.441 son pa Educación; 41.792.323 pa Cultura y Deporte; y cerca de 15.245.297 pa gastos corrientes comunes. González señaló que’l presupuestu de la so área ye “lóxicamente austeru y restrictivu" y que trata de priorizar la "equidá educativa y d’ordenar la ufierta cultural de la rexón". Asina, esplicó que s’optó por facer los axustes en "aquelles partíes que suponen un impautu menor na calidá del sistema educativu, intentando preservar la ufierta cultural y deportiva”.

Crítiques dures de Foro pol recorte al asturianu y pola política llingüística siguida polos gobiernos del PSOE

Foro de Ciudadanos foi la formación más crítica colos presupuestos pautaos pol PSOE, Izquierda Xunida y UPyD no que se refier a la estaya d’Educación, Cultura y Deporte. El diputáu Manuel Peña destinó a una parte importante de la so intervención nel turnu de fixación de posiciones tres la comparecencia de González a la partida destinada a la promoción y normalización de la llingua asturiana, pa lo qu’usó l’asturianu. Peña faló d’un amenorgamientu “del 36,27 por ciento en comparanza colos actuales presupuestos prorrogaos”, lo que calificó de “duru golpetazu pa la promoción del asturianu”.

“El so problema cola llingua asturiana ye que nun saben qué facer con ella. Nun tienen una idea clara sobre ónde quieren vela asitiada nos próximos años. Ye más; nin siquiera fueron a pensar nello. Y, agora, esta falta de previsión ta enseñándose dramática”, continúo’l diputáu de Foro, qu’añadió que “la so política, nestos años anteriores, foi siempre la del mal menor. Siempre-yos repunó esta cuestión. Siempre-y tuvieron munchu mieu al asturianu. Mieu a la normalización. Mieu al espardimientu. Mieu a la promoción. Mieu a les implicaciones alministratives de sentar cualquier precedente. Mieu al costu económicu futuru. Mieu a les implicaciones polítiques. Mieu al agraviu comparativu. Mieu, a última hora, a que tou esta tema se-yos escapare de les manes y quedare fuera de control; fuera del so control. Y por eso nunca s'atrevieron a tratar con grandor, con ambición, el futuru d'esti patrimoniu que nos pertenez a tolos asturianos”.

Peña tamién criticó que los gobiernos del PSOE “nunca fixeron nada por presentar una llei que desenvolviera l'artículu 4 del nuesu estatutu. Tuvieron que ser otros los que tomaren la iniciativa. Y por eso, una vuelta aprobada l’actual Llei d’Usu y Promoción, ustedes siempre l’aplicaron de forma descaradamente restrictiva”, echando en cara a los socialistes qu’hubiere “perres abondo” pa los “sos faraónicos proyeutos culturales”, pero non “pal nuesu patrimoniu”, faciendo referencia tamién al prerrománicu. “La so política llingüística siempre descansó n’eso: en nun tener una idea clara y en facer ver que cumplíen col mandatu estatutariu que-yos obligaba a ‘promover’ el bable. Y poco más. Y, eso sí, en conceder subvenciones”, siguó Peña, “pero’l problema ye qu’agora yá nun queda nin siquiera eso”.