El BOPA d’esti miércoles espublizó’l recorte a les subvenciones a entidaes llocales, que namái afeuta a los servicios de normalización llingüística. La mengua ye d’un 17 por cientu al pasar de los 92.400 euros previstos en mayu a 76.700.
Iniciativa pol Asturianu denuncia esta situación, que califica de “ataque nuevu al asturianu”. “La partida afeutada nesti casu ye la dedicada a normalización social del asturianu y gallego-asturianu pa les entidaes llocales, unes ayudes que sirven pa llevar a los conceyos, la entidá alministrativa más cercana al ciudadanu, les polítiques de normalización llingüística, qu’amás xeneren emplegos al traviés de los servicios de normalización”, esplica’l coleutivu nuna nota. Según los datos espublizaos nel BOPA, la estaya dedicada a la ‘Normalización social del asturianu y gallego-asturiano”, que recibía la menor cantidá de toes, ye la única que se toca, yá que los ‘Programes añales d’actividaes culturales’ y el ‘Funcionamientu de museos y colecciones museográfiques’ mantienen la partida inicial aprobada pol Gobiernu de Foro de Ciudadanos de 96.000 euros y 114.800 euros, de manera respeutiva. La mengua ye mayor si se tien en cuenta que l’añu pasáu’l presupuestu pa la normalización nos conceyos yera de 166.499,42 euros: un 54 por cientu menos.
“D’esta manera recortáse otra vegada onde menos hai pa recortar, dexando al asturianu nuna situación cada vegada más débil”, afirmen dende Iniciativa pol Asturianu, que reclama al Gobiernu “que si ha de facer recortes, faiga los mesmos de forma proporcional en toles partíes y nun cargue, como yá vieno faciendo a lo llargo de los meses últimos, contra la llingua asturiana”. Otra manera, el coleutivu que trabaya pa la normalización del idioma va entamar la selmana que vien una ronda de contautos colos grupos parllamentarios pa tresllada-yos ésti y otros asuntos urxentes qu’afeuten a la llingua del país. De momento, los únicos que respondieron al pidimientu d’Iniciativa pol Asturianu foron Foro de Ciudadanos y Izquierda Xunida.
Adxuntu | Tamañu |
---|---|
![]() | 190.31 KB |