Cultura entama unos alcuentros pa reflexonar sobre l'estáu de la creación artística n'Asturies

LABoral Centru d'Arte y Creación Industrial va acoyer ente’l miércoles y el vienres les xornaes ‘Parte del arte’, nes que van participar artistes, galeristes, comisarios, profesores y coleicionistes. L’oxetivu ye reflexonar sobre l’estáu de la creación artística nel país.

‘Parte del arte’, que tien el castellanu como llingua vehicular, ta impulsada pola Viceconseyería de Cultura y Deporte nel ámbitu de la comisión de coordinación de los equipamientos artísticos d’Asturies, que na reunión que celebró'l pasáu 10 de marzu nel Centru Niemeyer dispunxo diseñar un puntu d'alcuentru ente los axentes implicaos sobre’l procesu de la creación artística y enmarcalo nesti foru. Les llinies argumentales de les xornaes van xirar sobre l’oficiu de crear nos tiempos nuevos, el papel del comisariu artísticu, la situación del mercáu y los sos intermediarios y la formulación de propuestes y caminos nuevos en tol procesu de l'actividá artística.

Karin Ohlenschläger, nomada apocayá como direutora d'Actividaes de LABoral Centru d'Arte y Creación Industrial, va abrir les xornaes mañana, al meudía, cola conferencia ‘Transitando pol territoriu arte’, actu que va ser presentáu pol direutor del Muséu de Belles Artes d'Asturies, Alfonso Palacio. El vienres va zarrase, mentes, con una mesa redonda a la que se convida a a toles galeríes d'Asturies.

En total mientres los trés díes van participar trenta profesionales que, nun ámbitu o n'otru, dediquen el so tiempu a disciplines venceyaes col arte, y que van diagnosticar el so estáu actual n’alderiques nos que se va tratar dende la mesma creación artística hasta'l coleicionismu y el comerciu del arte, pasando poles rellaciones ente'l comisariu con artistes, galeristes museos, crítica y públicu, o cuestiones más concretes, como la de la necesidá de los estudios de Belles Artes n'Asturies.

Na semeya, María José Baragaño, del Institutu Asturianu de la Mocedá; Palacio; el viceconseyeru Vicente Domínguez; Carlos Cuadros, direutor del Centru Niemeyer; y Lydia Santamarina, direutora del Muséu Barjola.