Cultura anuncia más de 3 millones d’euros pa Política Llingüística

La Conseyera de Cultura Encarnación Rodríguez fixo ayeri la presentación pública de les sos cuentes proyectaes pal añu 2008 na Xunta Xeneral del Principáu. El proyectu de presupuestu, pendiente, como toles demás cuentes, d'una aprobación parlamentaria que pinta más que difícil, asciende a 148.952.102 euros, lo que supón una xuba del 8,21% respective al 2007. Dientro d'estes cuentes, el separtáu de promoción del asturianu llogra una cifra que se califica como "histórica" dende la Conseyería, qu'anuncia un incrementu del 25,32 por cientu respective al 2007. Asina, el presupuestu total de la Oficina de Normalización pal 2008 sedría de 3.100.818 euros, una cifra que s'asegura que "respuende al compromisu del Gobiernu asturianu cola promoción del asturianu y del gallego-asturianu nel so territoriu.

La Conseyería asegura que "con esti incrementu van poder siguir desarrollándose, amás, polítiques actives de promoción y abordar el II Plan de Normalización Llingüística del asturianu, actualmente en fase d'ellaboración".

La Conseyera Encarnación Rodríguez Cañas tamién destacó l'incrementu qu'hai previstu p'actuaciones informatives y de sensibilización social, que tienen acutaes 656.394 euros, y que diz que "va permitir poner en marcha delles campañes de divulgación toponímica, de vocabularios sectoriales y de matriculación escolar, ente otres midíes".