"Cuéstame creer que los que seleccionaron los cantares de Vegas o Tejedor seleccionaren el de Morán"

Fran Gayo, ún de los miembros del dúu "Mus" comenta p'Asturies.com les sos impresiones sobre'l premiu de la SGAE al meyor cantar n'asturianu.

Fran Gayo valora positivamente la creación del premiu, "Ta claro que la esistencia d'una categoría de meyor cantar n'asturiano ye un avance importante. Y esto independientemente de la opinión que podamos tener d'un órganu como la SGAE: la normalización, la presencia social nun tien que ser sólo de cara a les entidaes que puedan resultanos más afines a nós, la normalización va dir bien el día que nos pongan una multa d'aparcamientu n'asturiano. Otra cosa ye que s'esperare (inesplicablemente, na mio opinión) una mayor ecuanimidá per parte de la SGAE a la hora de dar el premiu".

En rellación a les formes coles que se llevó alantre'l procesu de seleción Gayo opina que "De mano la opinión sobre'l premiu ye d'incredulidá. Ensin querer faltá-yos al respetu al compositor nin a los intérpretes. Ya puestos pudieron nominar tamién a Melendi, polo menos la canción de "Asturias" ye conocida." El músicu va más allá, y énte les circunstancies nes que se desenvolvió esta primer convocatoria del premiu, piensa que "Nun se, paezme que tien dalgo de puñalada pela espalda enxaretar esa canción ente les nominaes y pa enriba que seya la premiada, si nos punxéremos conspiracionistes podríemos dicir que el premiu a "Nunca mais" paez talamente una operación muy refinada pa desacreditar al asturiano como llingua de cara a medios y a la intelectualidá non asturiana. Escuchen la canción y dicen: joder, pero si esto es castellano!".

A la hora de dicir que ye lo qu'hai que facer pa evitar estes polémiques nel premiu Fran Gayo considera que "Paezme innecesario tener una comisión llingüística a la hora d'esbillar los cantares. Veolo casi hasta negativo, porque esto ye más una cuestión de sentíu común: esti añu había una serie de cantares n'asturiano y otru, el ganador, nuna especie d'amiestu nel que prima el castellán con dalgunos xiros asturianos y, sin nun recuerdo mal, algo en galego. Lo importante ye que la esbilla de los temes seya fiable de principiu a fin, cuéstame creer que les mesmes persones que selecionaron los cantares de Nacho Vegas o los Tejedor seleccionaren tamién el de Morán".

Falando en concreto del cantar ganador Fran diz que "Nun opino del cantar. Seique'l fechu criticable ye'l premiu y les condiciones en que se dio, más que la mayor o menor calidá del cantar".