"Cuéstame aceptar qu’Asturies desaproveche una oportunidá histórica p’afayar el nuesu Estatutu", asegura Barbón

“Por más que pueda parecer inxenuu a estes altures, cuéstame aceptar qu’Asturies desaproveche, cuatro décades depués, una oportunidá histórica p’afayar el nuesu Estatutu”, apuntó Adrián Barbón na xornada conmemorativa pol cuarentenu aniversariu de la norma autonómica. Nella participaron tamién los ex presidentes Pedro de Silva, Juan Luis Rodríguez-Vigil y Antonio Trevín.

El llavianés punxo la conferencia 'La mejora del estado autonómico: el reto de la cogobernanza' nel actu celebráu esta mañana nel Salón Europa de la Xunta Xeneral, que principió recordando a Vicente Álvarez Areces, fináu hai agora 3 años. Na mesma señaló que “si tuviese que manifestar per ónde acometería una reforma del Estáu autonómicu, creo qu’apostaría too a reforciar la cogobernanza”, y plantegó “potenciar el Senáu como cámara territorial, institucionalizar y dotar de competencies decisories clares les Conferencies de Presidentes y, finalmente, federalizar dalgunos órganos de coordinación, como propunxi pal Conseyu Interterritorial de Salú” p’avanzar hacia una “Agencia Nacional de la Salud Pública”.

Mui pendiente de les negociaciones que tán llevando esti mes los grupos parllamentarios de la FSA, Podemos, IX y Foro pa la reforma estatutaria, defendió l’actualización de la norma “p’ameyorar el nuesu autogobiernu y contribuyir, asina, a fortalecer l’Estáu autonómicu. Ésa ye la estación final del percorríu que queremos entamar, y que sólo será posible si aflúi la suficiente intelixencia, responsabilidá, xenerosidá y disposición al alcuerdu que fixeron posibles tanto la Constitución española como’l nuesu propiu Estatutu”.

“Por más que pueda parecer inxenuu a estes altures, cuéstame aceptar qu’Asturies desaproveche, cuatro décades depués, una oportunidá histórica p’afayar el nuesu Estatutu”, apuntó darréu na so intervención, acortiando’l l testu qu’incluyía’l discursu apurríu a la prensa y qu’añadía “ameyorar el so autogobiernu y protexer el nuesu patrimoniu cultural”.

Rodríguez-Vigil nun ve necesidá de cambios

De los trés ex presidentes presentes, fixo referencia a la modificación de la norma comprometida pola FSA nel so programa eleutoral Rodríguez-Vigil, que recientemente salió en medios posicionándose claramente en contra la oficialidá del asturianu y llegó a firmar nun puestu de la plataforma qu'entamó la campaña d'ataque contra Adrián Pumares. Consideró que nun se debería de tocar la norma no que "al aumentu de competencies traducibles en servicios públicos se refier", sacante se consideren causes orgániques o polítiques "decisives pal bienestar y meyora de la vida de los asturianos", y, nesi casu, siempre con un consensu "que fora polo menos similar, na so capacidá de cohesión y validez, al que la fixo posible".

Pela so parte, Trevín, primeru en falar llueu del rector Ignacio Villaverde, fixo parte de la so intervención en llingua asturiana.

Na imaxe, Marcelino Marcos, presidente de la Xunta Xeneral, xunto con Barbón, De Silva, Rodríguez-Vigil y Trevín. Semeya obra d'Armando Álvarez.