La cuestación popular d'apoyu al Rebolleres entra nel so tramu final

Llévense recuadaos 1.750 euros cola fin d'entamar una edición nueva del festival.

El festival de rock de baldre qu'axunta a finales de xunetu a cientos de persones nel prau Gervasia, cubriendo'l güecu de les recordaes nueches celtes de Candás, fixo un llamáu a los sos incondicionales énte la incertidume creada pol Conceyu de Carreño por nun confirmar la subvención que recibiría esti eventu nel 2016, como asocedía n'años anteriores. Frente a esta situación, l'Ensame Xuvenil Trisquel recibió una respuesta tremenda, recaudando los 1.000 euros necesarios pa empezar a funcionar en menos de 60 horas.

Esta cantidá, según anuncia la organización na plataforma Verkami, serviría pa cubrir los gastos surdíos de los cartelos, diseños, camisetes y hoteles de los grupos, polo que decidieron ponese un segundu oxetivu de 1.500 euros pa la organización de la parte solidaria del festival, suma que tamién s'algamó a lo poco.

El tercer llistón, asitiáu nos 2.200 euros, ye'l que se ta intentando superar agora, pa lo que queden 9 díes. De momento son 1.750 los euros recaudaos, qu'aseguren una base económica pa trabayar na organización del que será'l VIII Festival Rebolleres Rock.