Cuenta atrás pal 8 de setiembre

Per primer vez en dellos años, l'asturianismu llega al mes d'agostu ensin que se sepa que actos tien convocaos pa la celebración del 8 de setiembre, día d'Asturies. Si otros años al llegar a estes feches yá se sabía que actos taben convocaos y quien los entamaba, esti añu el velu del misteriu tapó hasta va pocos díes l'estáu de la cuestión cara a esta fecha, clave pa toma-y el pulsu al movimientu asturianista.Ello ye que, arriendes de los actos convocaos pol Gobiernu asturianu, la movilización reivindicativa ta encadarmándose alredor de dos polos, dambos asturianistes, anque con paeceres estremaos. D'una parte, un grupu d'organizaciones, ente les que rescamplen Izquierda Xunida xunta los sindicatos CCOO, CSI y SUATEA tan preparando un actu conxuntu, lo más seguro que consistente nuna manifestación en Xixón. La coalición que dirixe Javier Valledor foi la primera en mover ficha esti añu, tentando axuntar a les más organizaciones posibles, pero la so propuesta, basada nunos mínimos políticos que recuperen les señes del desapaecíu "pautu pol autogobiernu" de mediaos de los 90, nun cuayó ente los partíos de calter más nacionalista, que nun-yos parez que los conteníos de la manifestación que promueve IX seyan los más adecuaos pa una xornada que, pa ellos, tien de tener otru conteníu.El teóricu grupude partíos definíos por ser proyectos non estatalistes, nel que taríen IAS, PAS y Andecha Astur, arriendes de los conteníos de la convocatoria d'IU, recelen de la oportunidá de que se faiga esta movilización a tan pocos meses d'unes elecciones. Anque inda ye ceo pa saber si estos partíos van dir xuntos a daqué o si al final organizarán caún pel so llau actos propios, parez qu'hai intentos pa entamar un diálogu cara a una posible convocatoria conxunta. La primer organización en movese nesta dirección foi Izquierda Asturiana, qu'asoleyó ayeri una propuesta xunitaria na qu'analiza la situación énte esti 8 de setiembre y anuncia la so intención de ponese en tratos colos otros dos partíos mencionaos y otros colectivos cara a una movilización conxunta. Otramiente, Andecha Astur, que criticó la convocatoria d'IU, tamién ta tentando ponese d'alcuerdu con otres organizaciones. Agora que nun se sabe entovía en que va parar la cosa pero yá hai unos elementos mínimos de xuiciu y que l'asuntu yá ye ún de los temes que más se traten nos tableros d'anuncies, proponemos en Conceyu Abiertu un debate sobre l'ocho de setiembre ¿como te prestaría que fuere?. Participa na encuesta y dexa la to opinión nos tableros.

Contador Estadistiques