Cuelguen na rede'l IV proyectu de la LSSI

Cuando se suponía que yera un documentu secretu, el cuartu proyectu de la Llei de Servicios de la Sociedá de la Información (LSSI d'equí en p'alantre) yá ta puestu na internet . El documentu filtrose al través del portal MakyPress, que pudo facese - nun se sabe como - col testu del proyectu, l'informe del Conseyu Xeneral del Poder Xudicial y el votu particular d'un de los xueces del CXPX. De ser cierto tolo que sal espublizao, el Ministeriu de Ciencia y Tecnoloxía acabaría de quedar a l'altura'l betún.Dende l'añu pasáu, la LSSI yera, xunta la LOU ún de los proyectos más criticaos del gobiernu del PP. D'entós p'acá, bien de particulares y organizaciones de defensa de los derechos civiles alvirtieron de los peligros que guardaba la LSSI, que-yos abultaba un atentáu a la llibertá d'espresión y a la circulación de conteníos pela rede, llegando delles persones hasta a considerala anticonstitucional. Los primeros análisis d'esti cuartu proyectu dicen que ye entovía más duru y restrictivu que los otros tres y que nun recueye nenguna de les modificaciones que se propunxeron.