Cuatro pueblos van probar ‘L'Aldea 0’, un proyectu pilotu pa revitalizar el mediu rural

Esta actuación del Gobiernu d’Asturies quier promover la rehabilitación de la cultura del territoriu y fomentar la innovación tecnolóxica y social cola fin de poder repetir nel futuru los resultaos llograos.

L’oxetivu ye lluchar escontra l’abandonu de les poblaciones pequeñes y convertiles en llugares afayadizos pa trabayar y vivir. La idea ye aplicar ‘L’Aldea 0’ por mediu d'intervenciones en entidaes de población pequeñes, como parroquies rurales y aldees, de cualquier puntu de la xeografía rural. De primeres, tán previstes midíes esperimentales en Mual (Cangas del Narcea), con 85 habitantes; Asiegu (Cabrales), con 92 habitantes; Porrúa (Llanes), con 419 habitantes, y Pion (Villaviciosa), con 392. El proyectu busca una viabilidá socioeconómica basada na recuperación de l'actividá local, la calidá de vida, el caltenimientu de conocencia esencial pa la xestión del territoriu, la integración de les tecnoloxíes y atopar preseos d'intervención pública-privada nuevos. Les midíes concretes d’intervención van ser llantar sistemes agroecolóxicos como rebaños conceyiles o n’andecha pa xestionar el territoriu o potenciar los productos autóctonos; crear una comunidá enerxética rural con un modelu de consumu colectivu; facer un sistema local d’empreses; promover espacios d’alcuentru interxeneracional y de recuperación de la cultura llariega; y promocionar fórmules nueves d’almacenar y tresmitir el conocimientu tradicional.

‘L’Aldea 0’ ta diseñada cola Conseyería de Mediu Rural y Cohesión Territorial, el comisionáu pal Retu Demográficu y CTIC Centru Tecnolóxicu. Va a implementase nel bieniu 2022-2023 con un presupuestu de 725.145 euros, de los que 578.947 va apurrilos el Ministeriu pa la Transición Ecolóxica y el Retu Demográficu y 146.197, CTIC.