Cuatro Ases de la Toná

Esti ye'l títulu del últimu discu espublizáu por Fonoastur, el cd presentóse la mañana del xueves n'Uviéu y xunta a cuatro de los meyores cantantes de tonada asturiana.

Ismael Tomás, José Manuel Collado, Jorge Tuya y El Ché de Cabaños son los protagonistes de los quince cantares d'esti discu. Podemos topar a los cantantes en solitario, dexando amuesa de les cualidaes y de les característiques particulares de les sos voces, o en cuartetos onde les voces van apoyándose unes a otres con igües propies de coru. Ismael Tomás dexa bien claro que ye una de les meyores voces a la gaita, Jorge Tuya aporta la so voz tranquila y reposada, Collado y el Ché de Cabaños aporten eses voces contundentes de la meyor tradición de la canción asturiana.

"Cuatro Ases de la Toná" nun ye un títulu casual, con él quier recordase a los que fueron conocíos popularmente como los primeros ases de la toná, Cuchichi, Botón Claverol y Miranda. Pero pa estos cuatro cantantes nun se trata d'entrar en nengún tipu de competencia, yá que caún de los cantantes tien el so momentu y el so estilu. Los cuatro cantantes tamién comentaron na presentación que nun se consideren un cuartetu anque dellos cantares nel discu podemos consideralos propios de coru. Nesti trabayu discográficu topamos la collaboración de dellos músicos qu'acompañen a los cantantes, la gaita tradicional de Vicente Prado "El Pravianu", la gaita midi de Diego Pangua, el pianu d'Emilio Huerta, el curdión de Pepín Robles y el de la curdionista de "La Bandina'l Tombu" Marga Lorences, la mandolina d'Héctor Braga, guitarres de Julio Gilsanz y percusiones de Julio Sánchez. Destaca especialmente'l trabayu de Gabino Antuña que punxo los teclaos nes más de los cantares amás de facer la producción del discu xunto con Chus Pedro, cantante de "Nuberu".

Una bona oportunidá pa escuchar a cuatro de les meyores voces de la tonada asturiana en cantares como "A la Pipiona", "En toa la Quintana", "Carretera d'Avilés", "Tengo de subir al puertu"...etc, qu'anque tengan un trabayu d'igües, siguen manteniendo l'estilu tradicional y característicu de la canción tradicional asturiana.