Cuatro agrupaciones participen nel XL Festival Folclóricu de Música y Danza Popular d'Avilés

Proceden de Canarias, Aragón, La Mancha y Asturies. Les actuaciones van desendolcase'l sábadu y el domingu nel Auditoriu del Niemeyer.

Baxo la etiqueta d'Avilés International Folk Festival va celebrase'l XL Festival Folclóricu de Música y Danza Popular d'Avilés, qu'entama'l Conceyu xunto col coleutivu Sabugo ¡Tente firme! y el Conseyu Internacional d'Organizaciones de Festivales de Folclor y de les Artes Tradicionales. El certame configúrase esti añu como una amuesa de la riqueza cultural del Estáu y les cuatro formaciones participantes van actuar los dos díes con programes diferentes.

Amás de los anfitriones, l'Agrupación Folklórica Sabugo ¡Tente firme!, van baillar n'Avilés l'Asociación de Coros y Danzas Mazantini (Ciudad Real, La Mancha), l'Agrupación Folclórica Audares (La Palma, Canarias) y Raíces de Aragón (Zaragoza, Aragón). El festival, con sesiones programaes a les 20 hores, ye de baldre pero ye necesario retirar invitaciones –un máximu de 4 per persona– nel Centru Niemeyer n'horariu de 10 a 14.30 y de 15.30 a 20.30 hores.

Na semeya, Abelardo González, presidente de l'Agrupación Folklórica Sabugo ¡Tente firme!; Yolanda Alonso, conceyala de Cultura y Promoción de la Ciudá; y dos miembros de l'agrupación avilesina.