Cuadonga acueye la III bienal de la esposición de pintura naturalista Picos d'Europa

La muestra itinerante, que ye una iniciativa del Patronatu del Parque Natural, va permanecer abierta hasta'l 21 de setiembre.

El Gran Hotel Pelayo de Cuadonga alluga dende güei la III Bienal de pintura naturalista Picos d'Europa. La esposición, que puede visitase tolos díes dende les 10 a les 18 hores, va tar abierta al públicu hasta'l próximu día 21 de setiembre, que se clausura a les 11 hores col actu d'entrega de los premios a los cuatro pintores gallardonaos.

La muestra, que ye una iniciativa del Patronatu Natural de Los Picos d'Europa, consta d'un total de 17 obres, escoyíes pol xuráu ente les 54 presentaes al concursu que tenía por lema “Bosques de los Picos de Europa”.

La esposición qu'agora se puede contemplar en Cuadonga, tien calter itinerante. Asina, con anterioridá pudo vese nes vertientes lleonesa y cántabra del Parque Nacional de los Picos d'Europa, en concreto nel Conceyu d'Oseya de Sayambre y el centru de visitantes de Sotama.

Ente les obres d'esta tercera bienal de pintura naturalista figuren: el primer premiu Nieve en el bosque, de Guillermo Fernández; Hayedo Palomberu nevado, Lago Ercina, de José Luis Beldarían que llogró'l segundu premiu; y, El bosque oscuro. Salvorón, de María José Castaño, y Panorámica en azules, de Joseph Plaja, gallardonaes con accésits.