Cuadonga 2022 pieslla cola esposición “temporal más ambiciosa” del Muséu Arqueolóxicu, compuesta por pieces de 21 instituciones

Dende esti xueves y hasta’l 9 d’abril va poder visitase nel Muséu Arqueóloxicu d’Asturies la esposición ‘Covadonga 722-2022. Las huellas y los relatos’, “la muestra temporal más ambiciosa” de la institución dende que ta na sede actual. Ta compuesta por más de 140 pieces de 21 instituciones de tol Estáu qu’amuesen el contestu arqueolóxicu de la batalla y pon el ramu a la programación Cuadonga 2022.

Comisariada pola direutora de la instalación, María Antonia Pedregal, y César García de Castro, rescampla pola relevancia, amplitú y variedá de los elementos espuestos y el númberu d’entidaes collaboradores. Ente les pieces que presenta ta’l tremis de Recaréu I, “un triente visigodu d’oro afayáu nes escavaciones del Castiellu de Gauzón que s’espón per primer vez al públicu”.

También sobresalen unos broches de cinturón masculín con palca ríxida de tipu liriforme, “a los que la tipoloxía tradicional asignaba esclusivamente feches del sieglu VII y qu’aporten datos d’interés sobre los guerreros de Cuadonga”. Completen la muestra pieces de cerámica, útiles d’usu diariu, bronces y monedes, mapes, armes que dan cuenta del tipu d’enfrentamientos que se producíen, broches de guerreru o esteles funeraries.

No que respeuta a los relatos, recueye testimonios comprendíos ente los últimos reinaos visigodos y l’entamu del emiratu independiente n’al-Ándalus. Amás de dibuxar l’entornu material de la época, la esposicion articula les dos versiones (llatina y andalusí) del mesmu periodu al traviés de los documentos que constitúin la fonte primaria pa reconstruyir los fechos.

La distribución

El guión espositivu de la muestra distribúise en delles seiciones. La primera reflexa les fontes árabes y llatines que narraron nel so momentu l’acontecimientu y revisa los componentes ideolóxicos qu’acompañan a Cuadonga, distinguiendo’l planu históricu y relixosu.

Un segundu fitu ufre contestu sobre l’espaciu xeográficu y el tiempu de la batalla, marcáu pola espansión árabe-omeya pel Mediterraneu y la ocupación de la Península Ibérica. “Pelayo y Cuadonga constitúin un binomiu indisociable y asina lo reflexa la muestra, que se detién sobre las dimensiones reales y la verosimilitú histórica de la contienda, asina como sobre les manipulaciones ideolóxiques de las que foron oxetu”, espliquen.

Al retratu de la época de la batalla resérvase un apartáu específicu qu’inclúi lo más destacao de l’arqueoloxía militar del momentu. ‘Covadonga 722-2022. Las huellas y los relatos’, con nome que nun respeta'l topónimu oficial Cuadonga/Covadonga, inaugúrase mañana al meudía y va poder visitase de baldre hasta’l 9 d’abril y supón l’últimu de los actos de la programación impulsada por Gobiernu pa conmemorar los 1.300 años de la batalla baxo’l nome de Cuadonga 2022.

Na semeya, tremis afayáu nel Castiellu de Gauzón, que s'espón per primer vez al públicu nesta muestra.