CSI, SUATEA Y CGT salen a la cai en Xixón pa protestar contra los recortes y les reformes económiques

|

Esti xueves, a partir de les 19 hores, va tener llugar un pasucais en Xixón convocáu polos sindicatos CSI, SUATEA y CGT pa protestar contra los recortes y les reformes económiques. La movilización va salir de la plaza’l Parchís.
 
La intención de los manifestantes ye percorrer les sedes “de los grandes partíos-empreses políticos y los grandes bancos, amás de delles empreses representatives de la esplotación llaboral qu’alimenta a los anteriores”, baxo’l lema ‘Votes lo que votes, la banca gana. Construyamos los nuesos derechos acabando colos sos privilexos. La llucha ye l’únicu camín”. Esta movilización coincide con una convocatoria a nivel estatal entamada polos sindicatos alternativos.
 
Dende la Corriente Sindical d’Izquierda (CSI), señalen que “les polítiques d'axuste sofítense sobre la idea de que ye necesario pagar una deuda que nun ye nuesa: nin nos consultaron al asumila nin la disfrutemos. Por eso, ye fundamental refugar esta deuda ilexítima y amosar que l'únicu camín pa salir de la crisis consiste n'acabar colos sos privilexos, en nome de los cualos pretenden recortar los nuesos derechos”.

Contador Estadistiques