CSI denuncia usu particular del helicópteru de los bomberos

El sindicatu pide que s'investigue'l posible usu particular del aparatu por parte del Xerente del serviciu 112 mientres los bomberos apagaben un fueu en Bual

Los fechos que denunció la Corriente Sindical d'Izquierdes (CSI) vienen de los díes 26 y 27 de xunetu, cuando según la CSl, el Xerente del 112 taba de vacaciones en As Figueiras. Esi mesmu día, y mientres los bomberos apagaben un fueu en Bual, emplegando los helicópteros de que dispón el Principáu, el xerente del serviciu d'emerxencies tendría dao orde de que pasare ún de los aparatos a recoyelu pa dir hasta la base de Llamorgal, d'au tendría vuelto n'otru aparatu de Bomberos d'Asturies hasta As Figueiras.

Según la central sindical, dende'l puntu de vista técnicu, nun existe protocolu d'actuación en tol Estáu que contemple'l tresllau d'un Xerente del 112 a llugar onde tea pasando les vacaciones con un aparatu de Bomberos, un viaxe qu'entraría como muncho na categoría de "Servicios Especiales" y que, en tou casu tendría d'autorizar la Dirección Xeneral de Seguridá Pública, responsable última del usu que se-yos dea a los aparatos de Bomberos d'Asturies. La CSI tien pa ella que l'actuación del Xerente del 112 ye "inconsciente y inmadura" y esixe que s'investiguen toles responsabilidaes polítiques y personales en que pudiere incurrir el xerente del 112, que depende n'últimu casu de la Dirección Xeneral de Seguridá Pública y de la Conseyería de Xusticia.