CSI, CGT y SUATEA convoquen una protesta nueva esti xueves en Xixón contra la reforma llaboral

Los sindicatos CSI, CGT y SUATEA van salir otra vuelta a la cai esti xueves pa protestar contra la reforma llaboral y la privatización de los servicios públicos. La marcha va salir a les 19 hores de L’Humedal, en Xixón.
 
La protesta mantién el mesmu lema que la celebrada’l 9 de febreru pasáu, tamién en Xixón, con un ésitu grande de participación: ‘Non a la reforma llaboral. Non a los recortes. Conta los ataques del capital’, a los que se sumen les coseñes ‘Sal a la cai, que nun te dexen nella’ y ‘Esto nun ye una crisis, ye una estafa’. La intención de los trés sindicatos con esti tipu de protestes contra la crisis que vienen celebrando de manera conxunta dende hai trés años ye “ganar na cai lo que tamos perdiendo nos despachos”, señaló Manuel Nieto, responsable d’organización de la Corriente Sindical d’Izquierda (CSI), na presentación de la manifestación a los medios. “Ye l’únicu camín qu’entendemos qu’hai que facer”, añadió darréu.
 
CSI, CGT y SUATEA esixen “la retirada total y inmediata de la reforma llaboral” y reclamen al Executivu que vaya entrar na Xunta Xeneral depués de les eleiciones del domingu “que nun apliquen nengún tipu de recorte no social, tanto n’educación, como en sanidá y servicios sociales”. D’otra miente, Nieto aprovechó la ocasión pa denunciar “la presión que tamos sufriendo dende la Delegación del Gobiernu y, en concreto, por parte de la Policía y la Brigada d’Información a delagaos sindicales de delles empreses”, pa depués recordar que “la represión nun ye’l camín”.
 
Beatriz Quirós, del secretariáu d’Asturies de Sindicatu Unitariu y Autónomu de los Trabayadores de la Enseñanza d’Asturies (SUATEA), criticó que ta utilizándose la escusa de la crisis “p’acabar colos derechos de los trabayadores” y calificóla d’estafa “porque ta aprovechándose pa dar dineru a los bancos, recortar y eliminar derechos al mesmu tiempu que s’unvíen al paru a millones de persones”. La sindicalista punxo l’exemplu de Catalunya pa esplicar cómo van vese afeutaos los servicios públicos pola reforma llaboral y afirmó que “la enseñanza pública tien muncho que dicir nesta crisis”. “Nun podemos quedanos de brazos cruzaos ante estes situaciones”, finalizó Quirós, que criticó l’actitú de “dalgunes organizaciones sindicales”, auguró recortes nuevos del Gobiernu estatal tres les eleiciones asturianes y andaluces, y sentenció que la movilización de la ciudadanía tien que ser d’ámbitu européu y mundial.
 
L’últimu en tomar la pallabra foi Jorge Muñiz, responsable de la Confederación General del Trabajo (CGT) Asturies, qu’esplicó que “esta situación vien d’atrás” y que la única opción que tien la ciudadanía p’afrontala ye “tar xunida” .Tamién criticó a CC OO y UXT pola so actitú nestos dos años últimos y por sentase cola patronal y firmar alcuerdos que perxudiquen a los trabayadores. “Lo que-yos pidimos, d’una vez por toes nesta situación, ye que corten esi cordón umbilical económicu que tiene con esti Estáu que tenemos agora, salga a la cai y peleen”, señaló. Por último, Muñiz reclamó “la eliminación de la reforma llaboral y que l’Estáu, el PP, actúen como tien qu’actuar: impuestos a les rentes altes y a los bancos, y respetu absolutu a lo algamao depués de tantos años nesta pseudemocracia”.    
 
Los trés sindicatos anunciaron qu’apoyen la convocatoria de fuelga de los mayoritarios del 29 de marzu, anque van manifestase por llibre en Xixón. Tamién que les movilizaciones van continuar a partir del día 30 y nun van quedase en flor d’un día.