Cróniques de la globalización

En véspora del conceyu del Ecofin n'Uviéu, nun ta de más traer ún de los temes estrella del anterior cume européu de Barcelona como foi el de la lliberalización del mercáu enerxéticu ente los paises de la UE, un procesu imparable que anuncia la posibilidá de precios más baratos pero del que nun se sabe muncho sobre aspectos como les sos implicaciones mediuambientales o, mesmamente, sobre lo que ta costándonos a toos, nin siquiera sobre la teórica baxada de los precios. Ello ye que la consultora Arthur Anderesen - Accenture, la mesma que ta metida nel casu de la eléctrica americana Enron, ye l'autora d'esti informe que ta acabante de llegar a la nuestra redacción y nel que fai un resume del estáu de la cuestión eléctrica n'Europa. L'informe conclúi que los estaos que más tan lliberalizando ye los clientes tienen meyores precios y servicios, poniendo al Reinu Xuníu d'exemplu de bones práctiques nesti sentíu, mientres que Francia, que s'opuso a una mayor liberalización en Barcelona, ye la oveya negra. Accenture alvierte que, anque los consumidores franceses tean mui a gusto colos precios que-yos pon el monopoliu estatal pola corriente, nun se dan cuenta de que les centrales nucleares y térmiques páguenles colos sos impuestos. Ensin aportar más argumentos, l'informe conclúi qu'hai que los franceses taríen meyor nun mercáu lliberalizáu onde los recursos de producción foren privaos.Llama l'atención que seya precisamente Accenture-Arthur Andersen la que profetice sobre les bondaes de la lliberalización del mercáu eléctricu n'Europa cuando la mesma consultora ta en crisis a cuenta de la so complicidá nel escándalu Enron, la compañía eléctrica más adaptada al mercáu lliberal nel mundu y responsable d'apagones, nel lliberalizadísimu mercáu californianu. Pa más aquello, ún de los puntos del Conceyu del Ecofin d'Uviéu trata precisamente sobre les consecuencies de la crisis d'Enron...

Contador Estadistiques