Crisis nel PP asturianu

Ayeri pela tarde, Isidro Martínez Oblanca, secretariu xeneral del PP de Xixón y candidatu a l'alcaldía dimitía de los sos cargos, abriendo asina la crisis na segunda fuercia política del país. Tres la dimisión d'Oblanca vinieron les de los sos rivales políticos dientro del PP, los conceyalesAlicia Fernandez Armayor, José Manuel García Losa, y José Luis Díaz Oliveira, colos qu'Oblanca llevaba tiempu enfrentáu. La resquiebra vieno a cuenta de la la llista que presentó'l PP de Xixón pa poner conseyeros en Caxastur. En cuantes qu'Armayor, Losa y Oliveira quedaben fuera de la llista de representantes municipales pol PP en Caxastur y que los puestos de conceyal suelen dase xunta los de representante en Caxastur, los tres escluyíos entendieron que'l partíu yá nun contaba con ellos pa ponelos en llista pa les elecciones del 25 de mayu, armando darreu d'ello un espolín al que respondió Oblanca presentando la dimisión primero que los tres conceyales, que tamién dexaron el cargu. En cuantes qu'Oblanca tenía y tien el sofitu mayoritariu de l'agrupación y del PP asturianu, nun se descarta que vuelva al cargu reforzáu tres de desfacese de los sos rivales políticos.Isidro Martínez Oblanca ye ún de los personaxes más importantes na cadarma del PP asturianu. Conceyal en Xixón dende 1.983 y diputáu na Xunta Xeneral na llexislatura 91-95, la so carrera dio un reblagu definitivu cuando salió senador por Asturies, encargándose en Senáu de llevar temes rellacionaos coles nueves tecnoloxíes. Dientro del PP de Xixón, Oblanca tien un sofitu mui grande, contando cola conceyala Pilar Fernández Pardo como valedora, y siempre se presentó al públicu como lamano derecha del Ministru de Fomentu álvarez Cascos. Aparte de la militancia política, a Oblanca conozse-y por participar na Fundación Caveda y Nava, motivu pol que-y fizo'l selmanariu les Noticies esta entrevista que güei recuperamos n'Asturies.com.