Crisis nel nacionalismu gallegu

Venti años depués de la so fundación, el Bloque Nacionalista Galego, referente electoral del nacionalismu nel país vecín, enfréntase a un conceyu nel que tendrá qu'analizar los porqués del so primer fracasu electoral. Agora que-yos vinieron mal daes, les estremaes formaciones polítiques que conviven nel sen del Bloque guarden les armes pa un debate del que nun se sabe mui bien si va salir un BNG reforzáu n'idegues y con cares nueves o una organización en crisis.

Amás del fracasu electoral, la imposibilidá de baltiar a Fraga y l'abandonu del enfrentamientu radical col PP gallegu en pro d'un entendimientu tamién enancharon de va poco p'acá la resquiebra ideolóxica ente los grupos d'izquierda del BNG, como la histórica UPG o la más nueva Esquerda Nacionalista, énte otros de corte más derechizáu como'l Partíu Nacionalista Galego. El portal gallegu Vieiros yá tien na rede un especial con abonda información sobre esti X congresu del BNG que va celebrase esti fin de selmana n'A Coruña

Contador Estadistiques