Créase un comité direutor pa impulsar la declaración de la cultura sidrera como Patrimoniu Cultural Inmaterial de la Humanidá

El Gobiernu dio’l preste a la creación d’un comité direutor pa impulsar la declaración de la cultura sidrera como Patrimoniu Cultural Inmaterial de la Humanidá. De calter consultivu, el so oxetivu ye ellaborar propuestes, configurar aiciones d'espardimientu y promoción, y apurrir suxerencies de cara a presentar la candidatura asturiana a la UNESCO.

Esti comité direutor va contar con una presidencia colexada formada polos titulares de les direiciones xenerales de Patrimoniu Cultural y de Desarrollu Rural y Agroalimentación, xunto col responsable del Conseyu Regulador de la Denominación d'Orixe Protexida Sidra d'Asturies. Tamién va tener diez vocales nomaos ente profesionales d'esperiencia y con capacidá pa impulsar la candidatura: Pablo León, Iván González Sánchez, Juaco López Álvarez, Inaciu Hevia, Eduardo Vázquez Coto, José Almeida, Joaquín Fernández Sánchez y Eduardo Crespo de Nogueira.

Luis Benito García, Xuan Fernandi, Cristina Cantero, Jorge Uría González y Xuan de Con Redondo, mentes, van dar asesoramientu científicu-técnicu a esti órganu, nel que los participantes nun van recibir retribución dalguna, magar la presidencia colexada va poder habilitar fórmules para reembolsar los gastos de desplazamientu y asistencia a les xuntes. La so función concreta ya la d’asesorar a l'Alministración pa impulsar la ellaboración de propuestes y configurar aiciones d'espardimientu y promoción, amás d'apurrir suxerencies sobre los procesos de participación social, dinamización y proyeición coleutiva que se faigan a lo llargo del procesu.

La intención del Gobiernu ye la d’alzar una propuesta en condiciones de ser escoyida pol Consejo del Patrimonio Histórico Español como candidatura estatal énte la UNESCO pa ser declarada Patrimoniu Inmaterial de la Humanidá, procesu que pretende rematar na primavera.