Creación del Serviciu de Normalización Llingüística de Grau ya Candamu

A finales de setiembre d'esti añu echó a andar el Serviciu de Normalización Llingüística de los Conceyos de Grau ya Candamu, como apuesta firme d’estos conceyos pola normalización de la llingua asturiana nel ámbitu municipal y social.

Esta nueva sección d’estos conceyos occidentales va depender de les respectives conceyalíes de cultura y va trabayar pola integración progresiva de la llingua asturiana en toles estayes de la sociedá.

Los oxetivos principales d’esta nueva sección municipal son dar usu a la llingua asturiana ensín prexuicios y usala cola firme convicción d’equiparala a la castellana na alministración local. Esta actitú positiva hacia la cultura propia yá vien reflexándose en delles actuaciones de los equipos de gobiernu de Grau y Candamu dende la última llexislatura y faise autónoma agora cola creación del nuevu plan de normalización.

Otra parte del trabayu del serviciu ha ser promover, asesorar y traducir testos y cartelería de las asociaciones de los dos conceyos, amás de sirvir de puntu d’apoyu p’aquelles persones que quieran dar promoción a la llingua asturiana en cualquier ámbitu de la sociedá. Ente les primeres xeres que tienen programaes ta organizar cursu d’asturianu básicu na Casa la Cultura de Grau y una renovación de la cartelería de la Casa Conceyu de Candamu.

El Serviciu ñaz cola ayuda de la Conseyería de Cultura d’Asturies y col apoyu de los conceyos de Grau y Candamu y forma parte de los planes de normalización llingüística que se vienen llevando a cabu dende los últimos años nos diferentes conceyos.

La oficina funciona los llunes y xueves en Candamu, y los martes, miercoles y vienres en Grau. El responsable d'esti serviciu ye'l filólogu Miguel Rodríguez Monteavaro.