Crítiques al Gobiernu balear por “arrequexar” al catalán

El grupu parllamentariu PSM-Iniciativa Verds-Entesa y Més Menorca criticó al Gobiernu balear del Partido Popular por “arrequexar” al catalán. La intención del Executivu ye que l’idioma dexe de ser requisitu nel accesu a la función pública.
 
El diputáu del grupu Antoni Alorda tachó esta midida del Gobiernu lideráu por José Ramón Bauzá de “atentáu contra la oficialidá” de la llingua catalana. Amás, criticó que'l primer proyeutu de llei del Gobiernu balear nun sía pa resolver l'actual situación de crisis económica, sinón pa “crear una división social”. “Ye intolerable’l misil llanzáu pol Gobiernu balear p’arrequexar el catalán”, añadió.
 
Per otra parte, el nacionalista señaló qu'una midida como ésta namái tendría que poder modificase si esistiera “un consensu social ampliu”. Sicasí, apuntó que “otra cuestión sería reconsiderar niveles d'esixencia –del catalán– dependiendo del puestu de trabayu”, lo que según dixo, ye “opinable”.