Coto dimite como presidenta de Foro y vocera parllamentaria

|
Cristina Coto ente María del Carmen Fernández Gómez y Pedro Leal

La situación llaboral d'una asesora de la so confianza provocó'l divorciu na formación.

Cristina Coto compareció esta mañana énte los medios p'anunciar la so dimisión como presidenta de Foro y como vocera parllamentaria, anque nun va abandondar el so escañu. El motivu ye la desautorización de Comisión Direutiva del partíu sobre la so decisión sobre la situación llaboral d'una asesora.

El grupu parllamentariu de Foro cuenta en total con dos, una con xornada completa y otra con media xornada, anque les dos exerciendo a tiempu completu, lo que Coto nun vía con bonos güeyos. La so decisión d'estende-y la xonrada a esta trabayadora foi frenada polos otros dos diputaos de la formación, Pedro Leal y María del Carmen Fernández Gómez, lo que provocó los primeros roces.

"Ye hora de dicir basta", afirmó güei Coto, que señaló que la llegalidá xurídica ta perriba de los estatutos del partíu, en referencia a l'acusación recibida de nun siguir los precidimientos afitaos nel mesmu nesti asuntu. "Pa tar y nun ser, meyor nun tar", concluyó al tiempu que dexó entrever qu'exerció como presidenta de Foro siempre ensin autonomía.

Leal y Fernández Gómez dicen que "se contradiz"

El comunicáu lleíu por Coto, n'opinión de Leal, "contradizse coles afirmaciones que nos treslladó'l pasáu llunes 11 de xunu a les doce hores na reunión del grupu parllamentariu debidamente convocada al efeuto pa tratar l'asuntu de la propuesta a la reunión de la Comisión Directiva Regional de la tarde del miércoles 13, aconceyamientu nel qu'afirmó que-y paecía oportuna la convocatoria de la citada comisión estraordinaria, reconoció que s'obcecara nes decisiones últimes decisiones que tomara de manera unillateral referentes a la estructura de personal del grupu parllamentariu y asegurónos qu'acataría, como nun podía ser d'otra manera, la decisión que la Comisión Direutiva de Foro adoptase de manera democrática porque yera la so propia direutiva, a la que finalmente nun asistió por voluntá propia, a pesar de treslladanos que sí lo fadría". "Esperamos que como presidenta de la Comisión Direutiva de Foro y como vocera del grupu parllamentariu, convoque nel menor tiempo posibles les reuniones correspondientes de dambos órganos pa facer efeutiva la so voluntaria decisión y que los órganos de Foro adopten los alcuerdos correspondientes como consecuencia de les mencionaess decisiones de Cristina Coto”, señaló Fernández Gómez.

Na semeya, Coto, nuna intervención na Xunta Xeneral, ente Fernández Gómez y Leal.

Contador Estadistiques