Cospedal diz que’l PP nun va sancionar a los conceyales que votaron a los candidatos de FAC

La direición del PP estatal nun va sancionar a los conceyales de Xixón, Valdés, Salas, Amieva y Cabrales que votaron a favor de los candidatos de FAC pa qu’algamaren l’alcaldía. Desobedecieron asina’l mandáu de los dirixentes del partíu.
 
“Nun hai nada sobre sanciones”, declaró en rueda prensa la secretaria xeneral del PP y presidenta electa de Castilla-La Mancha, María Dolores de Cospedal, cuando se-y preguntó si tenía previsto tomar dalguna midida contra'l PP de Xixón. Según añadió, el so partíu “tien que defender y representar a los votantes del PP” y eso ye lo que van “facer”. “Ye lo que se fixo'l pasáu día 11 d'una manera o d'otra dependiendo de los sitios y vamos facelo tamién el próximu día cuando se constituya'l parllamentu asturianu. Y nun hai nenguna otra directriz nesti sen”, reiteró.
 
A la entruga de si’l PP asturianu va apoyar al ex ministru Francisco Álvarez-Cascos na sesión d'investidura, Cospedal indicó que'l so partíu sigurá trabayando hasta la fecha de la constitución del Parllamentu asturianu. “Nun hai nenguna otra decisión”, dixo. De siguío almitió que la fuerza política más votada ye FAC y recordó que'l PP “dixo siempre, nel ámbitu de los gobiernos autonómicos, qu'hai que garantizar la gobernabilidá”. Eso sí, sorrayó que Cascos “nun necesita de nengún apoyu parllamentariu o de gobiernu pa que puea salir investíu presidente”.
 
Otra manera, dalgunos miembros de la Xunta Llocal del PP de Xixón defendieron güei a los cinco ediles del so partíu que’l sábadu pasáu votaron a favor de Carmen Moriyón y manifestaron la so disposición a que si s’espedienta a los conceyales, tamién se faiga con ellos yá que formaron parte de la decisión que s'adoptó poco antes del Plenu que posibilitó echar a los socialistes de l'alcaldía tres 32 años nel gobiernu llocal.