Corvera tamién aprueba una moción de sofitu a la oficialidá

Somos Corvera, el PSOE y Izquierda Xunida sacaron alantre en Plenu una moción de sofitu a la oficialidá del asturianu, convirtiéndose asina Corvera nel decimosegundu conceyu que da esti pasu. USPC astúvose, mentes que Foro y PP votaron en contra.

El documentu presentáu poles dos formaciones d’izquierda inclúi dos puntos. Nel primer espón que “considera que ye’l momentu d’avanzar na oficialidá del asturianu como elementu fundamental pa la so dignificación y normalización social”, instando “a les distintes fuerces polítiques con representación parlamentaria a comenzar un procesu de diálogu y consensu sobre la llingua asturiana”, mentes que nel segundu reclama “apoyar al gobiernu municipal nel desarrollu y fomentu de midíes d’usu nel ámbitu municipal que favorezan la normalización del asturianu nel conceyu”.

La Unión Social y Progresista de Corvera (USPC) decidió astenese, mentes que Foro y PP votaron en contra, polo que’l resultáu final foi de 14 a 2, con una astención. Nel alderique previu a la votación, la edil María Teresa Domínguez Murias amosó la mesma llinia que Francisco Álvarez-Cascos, esto ye defensa del asturianu ensin imposición de la llingua asturianu, saliendo nel so discursu les pallabres nacionalismu y costu.

Rogelio Crespo, conceyal que defendió la moción, argumentó contra’l mieu al nacionalismu “que’l mieu al mieu ye un poco rídiculu”, y punxo l’exemplu de Galicia, territoriu onde la llingua propia ye oficial y onde’l PP tien mayoría absoluta. Tamién refirióse al país vecín pa valtar la idea de que la oficialidá supón un costu, “yá que’l PIB xeneráu pol tema cultural supera al de dalgunes industries”.

L’edil amosó la so satisfaición pola mayoría amplia consiguida pola moción y destacó’l sofitu al asturianu en Corvera, “un conceyu dual onde convive una zona rural onde hai memoria de la llingua y una zona que, cola llegada d’ENSIDESA, ganó habitantes que nun son falantes d’asturianu”. D’igual forma, emponderó’l llabor de la Casa de la Llingua dende la so creación.

Doce conceyos

L’aprobación d’esta moción en Corvera convierte a esti conceyu nel decimosegundu que da esti pasu. La llista ta conformada por Mieres, Xixón, Uviéu, Avilés, Noreña, Ḷḷena, Castrillón, Llaviana, Villaviciosa y Grau, amás de Bimenes, qu’oficializó l’asturianu nel 2016.