Corvera entama un taller de baldre sobre la historia d'Asturies

|
Cartelu taller 'Una entruga pa cada historia'

Lleva'l nome de 'Una entruga pa cada historia. Asturies del sieglu XV al sieglu XVIII'.

El Serviciu de Normalización Llingüística de Corvera repite la esperiencia de payares y avientu del 2014 de poner en marcha un taller sobre la historia d'Asturies, calteniendo'l versu del poema 'Entrugues d’un obreru de la que llee un llibru', de Bertol Brecht, nel nome. "Tamién nesta ocasión la iniciativa busca introducir na historia d’Asturies a les persones interesaes, siempres dende un planteamientu abiertu y rigorosu al empar, col que s’acerquen a cuestiones como’l Principáu d’Asturies, la cultura na Edá Moderna asturiana, les condiciones de vida del campesináu, el papel de la Ilesia, la Xunta Xeneral y la influencia de fechos históricos esternos na realidá asturiana, ente otres cuestiones más", espliquen dende'l Conceyu de Corvera.

Rafael Rodríguez Valdés, téunicu del SNL y llicenciáu n’Historia pola Universidá d’Uviéu y postgráu n’Archivística pola UNED, va encargase de poner les clases, que van desendolcase los miércoles de 18 a 20 hores nel Aula 2 del Centru Sociocultural de Les Vegues. Éstes van comenzar finalmente'l miércoles 24, una selmana más tarde de lo previsto, y van distribuyise en ochos sesiones hasta'l 19 de xunu.

La inscripción pal taller ye de baldre y ha de formalizase enantes del comienzu de les clases nos rexistros del Conceyu. Como complementu, a lo llargo del cursu va contase cola participación de trés historiadores especialistes na dómina moderna que van ufrir charres temátiques demientres el taller.

Contador Estadistiques