Corvera entama un cursu d'asturianu p'adultos con amplia carga práutica escrita y oral

|
Cartelu cursu d'asturianu Corvera seronda 2021

Va tener llugar los martes de 18 a 20 hores en Les Vegues y les clases van ser de baldre.

La vuelta progresiva de l'actividá depués de los meses duros de la pandemia permite al Conceyu de Corvera recuperar los sos cursos d'asturianu. Pa esti trimestre entama ún d'adultos cola fin de "ser un mecanismu d'afondamientu nel conocimientu y deprendimientu de la gramática asturiana y otres cuestiones más del idioma pero tamién una manera d'acercase a la cultura asturiana".

El téunicu responsable de la Casa de la Llingua, Rafael Rodríguez Valdés, va encargase de poner les clases, na que va incidise de manera especial na práutica escrita y oral, con tamién actividaes complementaries al alumnáu del cursu. Los conteníos concretos son los siguientes: repasu de les normes ortográfiques; gramática de la llingua asturiana; situaciones comunicatives, escrites y orales; traducción; actitúes y prexuicios llingüísticos, qué son y cómo funcionen; y creación n'asturianu.

En total van ser 20 hores llectives, tolos martes del 26 d'ochobre al 21 d'avientu de seis a ocho de la tarde nel Aula 2 del Centru Sociocultural de Les Vegues. El cursu ye de baldre y la xente interesao ha inscribise nos rexistros municipales hasta'l día del entamu.

Contador Estadistiques