Corvera entama un cursu básicu d'asturianu

La matrícula, de calter gratuitu, va tar abierta hasta'l martes, anque les clases van dar comienzu finalmente'l 7 de marzu.

El Cursu Básicu de Llingua Asturiana pretende "ser un mecanismu pa la población adulta de deprendimientu de les normes básiques d’escritura del idioma, pero tamién una manera d’acercase a aspectos de la cultura asturiana". Asina, los participantes van dar los conteníos siguientes: historia de la llingua asturiana; léxicu, sintaxis y morfoloxía; normes ortográfiques; introducción a la toponimia de Corvera; y creación cultural n’asturianu.

Rafael Rodríguez Valdés, responsable del Serviciu de Normalización Llingüística de Corvera, va encargase de poner les clases, que van desendolcase los martes y xueves de 18 a 20 hores nel Aula Polivalente del Centru Sociocultural de Les Vegues. El so llargor va ser de 30 hores y ye de calter gratuitu.

Pa formalizar la inscripción hai de plazu hasta'l martes y ha de facese nos rexistros del Conceyu.