Corvera entama un añu más el cursu básicu d'asturianu p'adultos

Ye de baldre y tien una duración de 20 hores.

Esti martes echa a andar una edición nueva del Cursu Básicu de Llingua Asturiana qu'entama'l Conceyu de Corvera al traviés del so serviciu de normalización llingüística. Ésti "quier ser un mecanismu pa la población adulta de deprendimientu de les normes básiques d’escritura del idioma, pero tamién una manera de practicar la conversación oral n’asturianu".

Dividíu en diez sesiones, tolos martes de 18 a 20 hores nel aula 2 del Centru Sociocultural de Les Vegues, va afondar nel léxicu, sobre manera'l del entornu más cercanu, esto ye, familia, ociu o trabayu; na sintaxis y morfoloxía; y nes normes ortográfiques, pa trabayar tanto la redaición como la oralidá. El maestru va ser Rafael Rodríguez Valdés, téunicu responsable del SNL corveranu.

La matrícula pue formalizase hasta mañana, primer día del cursu, en cualesquier Rexistru del Conceyu. La clase cabera va ponese'l 26 de mayu.