Corvera entama dos cursos de baldre al rodiu la llingua asturiana

|

Ún ye de nivel avanzáu y l'otru trátase d'un taller de conversación y redaición. Estos díes son los caberos pa matriculase pa dambos.

El cursu de llingua asturiana ta destináu a persones que tengan un conocimientu previu del idioma, pa siguir afondando nel mesmu. Les clases celébrense tolos martes de 18 a 20 hores nel Aula 2 del Centru Sociocultural de Les Vegues y ta compuestu por un total de 10 sesiones hasta'l 18 d'avientu.

El primer día va ser mañana, momentu hasta'l que se pue formalizar la matrícula, que ye de baldre, nos rexistros municipales. Rafael Rodríguez Valdés, responsable del Serviciu de Normalización Llingüística, va encargase de poner les clases con estos conteníos: repasu de les normes ortográfiques; gramática de la llingua asturiana; situaciones comunicatives, escrites y orales; traducción; actitúes y prexuicios llingüísticos, qué son y cómo funcionen; y manifestaciones artístiques n’asturianu.

Los miércoles

El taller Escrifala céntrase n’esclusiva nel usu oral y na meyora del asturianu escritu. Dirixíu a persones que tengan tamién un conocimientu previu del idioma, quier ser una manera de conocer les posibilidaes espresives del asturianu, estremando rexistros, aumentando’l léxicu, etc.; y tamién un mecanismu d’afondar y encuriosar la manera d’escribir en llingua asturiana.

Les clases van impartise los miércoles, de 18 a 20 hores nel Centru Sociocultural de Les Vegues, siendo tamién de calter gratuitu. La primer sesión va desendolcase pasao mañana, xornada cabera pa facer la matrícula nos rexistros municipales de Corvera.

Contador Estadistiques