Corvera difunde un 'Calendariu de la güerta n'Asturies' pa poner en valor la tradición agrícola

|
Calendariu de la güerta n'Asturies

La campaña, n'asturianu dafechu, cuenta con dos fases, la segunda destinada a escolinos.

La iniciativa del Conceyu de Covera, que cuenta cola collaboración de la Conseyería d’Educación y Cultura, quier fomentar l’usu del idioma y poner en valor la tradición agrícola al traviés de la edición de cartelos y trípticos n’asturianu nos que s’informa de manera gráfica de los tiempos de sema de distintes hortolices y llegumes. La primer fase ta dirixida a la divulgación y conservación de la cultura material y inmaterial rellacionada col mundu agrariu asturianu y consiste nel repartu de 500 exemplares del 'Calendariu de la güerta n'Asturies' y de 3.000 folletos, que van distribuyise per comercios llocales, la Cooperativa d’Agricultores y les persones que sían concesionaries de los güertos urbanos de Los Campos.

Mentes, la segunda fase va centrase nos colexos del conceyu. El 'Calendariu de la güerta n'Asturies' ufre información de la rellaición ente les fases llunares y la sema, mesmo que de los meses nos que se recomienda semar y recoyer les hortolices y llegumes más frecuentes n’Asturies, que van dende l’acelga a les calabaces, pasando pela coliflor, la llechuga, les fabes, los puerros o los tomates, hasta un total de 24.

El calendariu complétase con un refraneru venceyáu cola güerta, con dichos asturianos como 'les fabes de San Xuan florecen y nun dan' o 'mayu fai payar y agostu maizal', y llanza na portada’l mensaxe principal de la campaña: “Asturies ye un país de gran tradición agrícola. Agora, dende los nuestros conceyos queremos promover una vuelta a la tierra, recuperando les palabres y los conocimientos de los homes y muyeres depositarios de la tradición agrícola asturiana”. Les persones interesaes nel calendariu y nos folletos pueden solicitalos na Casa de la Llingua, con sede nel Centru Sociocultural de Les Vegues, o nos teléfonos 985.51.40.01 y 610.748.604.

Contador Estadistiques