Corquiéu, Skama la Rede y La Bandina lideren el Premiu al meyor cantar d'Asturies.com

Tres de la primer selmana de votaciones, los llectores d'Asturies.com yá entamen a amosar les sos preferencies a la hora d'escoyer el que foi'l meyor cantar asturianu del 2005. Asina, y hasta agora, los cantares "Na caleya" de La Bandina, "Internacionalista" de Skama la Rede y "Llara" de Corquiéu son los trés temes que nesti momentu más sofitos tienen recibíos. Rescampla lo estremao de los estilos de los trés cantares, que van dende'l folk más acústicu hasta'l rock-ska. Con too y con ello hai otros cantares que tán raspiando en númberu de votos a estos primeros clasificaos. Asina "Comparte" del grupu d'Hip Hop K-Nalón, "Esnalar" de Llangres, o cantares de Corquiéu como Ribeseyana o Viquina tán recibiendo tamién el preste del públicu.

Casu aparte ye'l de Dixebra, y ello ye qu'anque'l grupu recibe votos abondos, éstos repártense ente varios cantares del so últimu discu "Ensin Novedá", colo que nengún d'esos cantares rescampla como pa entrar nel tríu de más votáu. De toes maneres, los siguidores de Dixebra amuesen un enclín especial polos temes Día del Ciclón, La Caballería y El Manteru.

Inda queda per delantre una selmana entera de plazu pa votar hasta'l próximu 20 de xineru, cuando va finar la primer fase d'esti concursu de la que va salir el tríu de cantares más votaos que van pasar a la final. Poro, les posiciones entovía pueden camudar muncho y convidamos a aquellos llectores que nun dieron el so votu aque lo faigan equí, y participen nesti Premiu Asturies.com al Meyor Cantar n'Asturianu 2005, que cuenta cola collaboración de los nuestros patrocinadores, les cases de discos
L'AGUAÑAZ y
FONOASTUR, los locales
EL CAFÉ TRISQUEL y EL BARUKU,
l'asociación
ESCUELA
DE MÚSICA TRADICIONAL LA QUINTANA DE XIXÓNy la empresa
ARAZ NET.