Corquiéu celebra 18 años de trayeutoria con un conciertu nel chigre de mesmu nome en Ribeseya

Nel añu 1997 echó a andar Corquiéu, ún de los grupos folk más valoraos del país. Con motivu de la so ‘mayoría d’edá’, la banda del oriente celebra un conciertu esti sábadu nel chigre del mesmu nome asitiáu nel muelle de Ribeseya.

La banda va interpretar nesta actuación los temes que consideren más importantes de la so trayeutoria y tien preparaes delles sorpreses pa los collacios y siguidores que s’averen mañana hasta Ribeseya. El conciertu tamién pretende ser un homenaxe a David Mateos ‘Puru’, percusionista de la banda fináu nel 2012 tres un incidente desgraciáu col so coche de rally y xerente del propiu Chigre’l Corquiéu, una referencia pa tolos aficionaos al folk que visiten la villa.

Nos sos 18 años d’ensayos, grabaciones y conciertos, los rioseyanos editaron un total de trés trabayos, ‘La barquera’, ‘Salia’ y ‘Suaña’, amás de participar colos sos cantares en dellos recopilatorios. Nesti tiempu tamién tuvieron l’honor de llevar la música asturiana per toda Europa, con actuaciones en Breizh, Alba, Hungría o Dinamarca, ente otros países. Una trayeutoria más que destacada que pretenden celebrar mañana dende les 23.30 hores colos suyos nel chigre que ye la so casa.