Coros de dieciséis escueles xixoneses participen en 'Cantar presta muncho'

|
Coros de dieciséis escueles xixoneses participen en 'Cantar presta muncho'

La cuarta edición del programa 'Cantar presta muncho' va tener llugar esti domingu nel Teatru Xovellanos dividíu en dos sesiones, mañana y tarde. Nacho Fonseca coordina esta actividá que se desendolca a lo llargo del añu y que fina con esta gala.

El proyeutu "tien como oxetivu averar a los escolares del conceyu a la música coral d'una forma cenciella, abierta, activa y participativa. Los coros tán formaos por alumnos de diferente nivel, con un repertoriu formado por cantares cenciellos que se vienen preparando nes sesiones de trabayu conxuntu", espliquen dende la Oficina de Normalización Llingüística de Xixón. Asina, van interpretase temes mui diversos, siempre n'asturianu, tanto populares como clásicos infantiles de Xentiquina.

Precisamente Fonseca, alma creadora de Seliquín y Xentiquina, encárgase de la coordinación de los coros, que mañana van facer una muestra del trabayu desendolcaú a lo llargo del cursu escolar. Na primera, con comienzo a les 12 hores, participen el Jacinto Benavente, el Xovellanos, el Severo Ochoa, l'Elisburu, el García Lorca, el Clarín, el Castiello y un coru de profesores dirixíu por Fonseca que va repetir pela tarde.

La sesión vespertina va dar aniciu a les 18 hores y nella van actuar los colexos El Llano, Sanatorio Marítimo, San Lorenzo, Los Pericones, Montevil, La Milagrosa, Príncipe de Asturias y Rey Pelayo.

Contador Estadistiques