Convoquen una concentración contra la reposición de plaques franquistes n'Uviéu

|
Concentración plaques franquistes Uviéu

Delles asociaciones memorialistes recuerden que'l xeneral falanxista Juan Yagüe foi "represor d'Ochobre del 34".

El Conceyu d'Uviéu procedió la selmana pasada a reponer les plaques de cuatro de les ventiún cais de la ciudá con referencia al franquismu que l'anterior equipu de gobiernu retirara pa facer cumplir la Llei de Memoria Histórica. En concreto foron les de Marcos Peña Royo, General Yagüe, Yela Utrilla y Fernández-Ladreda, atendiendo a un mandáu del Tribunal Superior de Xusticia d'Asturies (TSXA), tres recursu del PP, la Hermandad de Defensores de Oviedo y el ciudadanu José María Pérez, por entender qu'estes cais nun se veríen afeutaes pola norma.

Asina, Arquitectos Galán, Profesor Juan Benito Argüelles, Lola Mateos y Joaquín Costa, nomes colos que se bautizaren, de manera respeutiva, recuperen el nome anterior. Esta reposición algamó una importante repercusión y xeneró numberoses crítiques, convocándose pa mañana una concentración de refugu.

Ésta ta entamada por La Comuna d'Asturies y la Coordinadora estata d'Apoyu a la Querella Arxentina contrra Crímenes del Franquismu (CeAQUA), la Federación Asturiana Memoria y República (Famyr), la Estaya de la Memoria Altu Nalón, el Foro Pozo Fortuna, l'Asociación de Familiares y Amigos de la Fosa Común de Tiraña (AFA Fosa Tiraña), l'Asociación Republicana del Cabu Peñes Cristino Garcia, l'Asociación Trece Rosas Asturias, l'Asociación de Familiares y Amigos Fosa de Parasimón, y l'Ateneo Republicano de Asturias, y va tener llugar a les 19 hores na esquina de la cai Toreno cola del Profesor Juan Benito Argüelles, agora otra vuelta del General Yagüe, "carniceru de Badajoz y represor d'Ochobre del 34".

"Nun se pue querer ser demócrata y apoyar al fascismu: o se ta con unos o con otros", aseguren estes asociaciones memorialistes al tiempu qu'afirmen "que cualquier solución ye meyor que siguir calteniendo los nomes de cais heredaos del tiempu de la dictadura".

Contador Estadistiques