Convócase'l primer concursu de 'youtubers' en llingua asturiana

L'oxetivu ye visibilizar l'idioma "en toa triba de videos en formatu de programes per Internet" y descubrir talentos nuevos.

Baxo'l nome de '¡Yes Youtuber!' la canal PlayPresta y la productora Cuatro Gotes Producciones convoquen esti concursu destináu a xente de toles edaes. Ésti ta abiertu a toles propuestes posibles, dende opinión a entretenimientu, pasando per videotutoriales, telerealidá, ficción y otres propuestes nueves o formatos recuperaos y adaptaos al mediu dixital.

Pa participar han presentase vídeos de menos de 5 minutos que podrán mandase n’archivu o colgase en plataformes como YouTube de forma pública o privada.  Amás, alredor d’esti concursu, la plataforma PlayPresta tien previsto organizar actividaes de difusión y visibilización de los proyeutos presentaos n’institutos y eventos culturales.

El xuráu, que va tar formáu por pol equipu técnicu de PlayPresta, asina como por presentadores de la canal y otres persones venceyaes al audiovisual asturianu y a la normalización llingüística, va valorar "la calidá de los conteníos, l’inxeniu y la orixinalidá, ensin tener en cuenta la calidá téunica de forma preminente, pero sí la calidá llingüística del asturianu utilizáu (a nivel fonéticu, léxicu, sintácticu, etc.), asina como l’interés normalizador y la potencialidá pa llegar a la mocedá de la propuesta", amás de "les dotes interpretatives o comunicatives y l’aprovechamientu de los recursos propios del llinguaxe audiovisual y la so capacidá d’incidencia nel públicu".

Hasta'l 15 d'abril

El plazu pa inscribir los videos, ensin tope nengún, nel concursu '¡Yes youtuber!' ye hasta’l 15 d’abril a les 23.59 hores. Pa ello han de rellenar un formulariu na web de PlayPresta.

La organización divide'l mesmu en trés estayes: escolar, mocedá y adultos, con premios en toes elles. Les recompenses van dende la grabación d’una temporada completa con medios profesionales nes instalaciones de Cuatro Gotes Producciones o nel centru educativu participante a llotes de productos culturales n’asturianu, asina como 150 euros pal casu de los premios p’adultos.

D’ente toles categoríes, van otorgase amás les siguientes reconocencies a la eficiencia comunicativa,  a la calidá técuica, a la calidá llingüística y a la orixinalidá.