Convócase’l premiu lliterariu nuevu, el Pachín de Melás de testos teatrales

|
Premiu Pachín de Melás de testos teatrales

Los autores van tener hasta’l 19 de xunu pa presentar un testu teatral o un conxuntu de pieces breves, que se puedan representar con un llargor d’ente 50 y 90 minutos, al octavu de los Premios Lliterarios qu’entama la Conseyería de Cultura Política Llingüística y Turismu. Trátase del Pachín de Melás, que ta acabante de convocase.

Esti concursu tien l’oxetivu de “consolidar, arriquecer y prestixar la llingua y la cultura asturianes, na creencia, además, de qu’actuaciones como ésta contribúin de forma eficaz a dinamizar l’actividá cultural de la Comunidá Autónoma, y, n’especial, un aspeutu tan importante de la mesma como ye’l de la creación lliteraria de testos teatrales en llingua asturiana”. Incorpórase asina a la llista de los Premios Lliterarios qu’entama’l Gobiernu en xéneros como novela (Premiu Xosefa Xovellanos), poesía (Premiu Xuan María Acebal), ensayu (Premiu Máximo Fuertes Acevedo), lliteratura infantil y xuvenil (Premiu María Josefa Canellada) y cómic (Premiu Alfonso Iglesias), a los qu’hai que sumar los creaos nesta llexislatura, el de traducción (Premiu Florina Elías) y ún destináu a narrativa escrita por menores de 31 años (III Premiu Enriqueta González Rubin).

El ganador del Pachín de Melás va tener una recompensa de 6.000 euros. Otra manera, la conseyería “resérvase’l derechu d’espublizar n’esclusiva la primer edición de la obra premiada y la coproducción de la obra teatral con una compañía de teatru profesional, dando por retribuyíos col premiu los derechos d’autor de la primer edición”.

Pueden optar al premiu toos aquellos autores que presenten obres teatrales orixinales escrites en llingua asturiana y que puedan ser representaes con un llargor d’ente 50 y 90 minutos, yá sía un un únicu testu teatral o un conxuntu de pieces curties. Queden fuera de concursu les adaptaciones, versiones o rellectures d'otros testos publicaos o exhibíos de forma pública.

Cada escritor pue presentar un máximu de trés trabayos y nun van poder participar aquellos que yá se presentaron al Premiu Nel Amaro de Teatru Profesional n’Asturianu o Gallego-asturiano d’esti añu. El plazu pa entregalos fina’l 19 de xunu.

Contador Estadistiques