Convocaes les ayudes de la Política Agraria Común

Alredor de 10.900 agricultores y ganaderos van poder beneficiase de les ayudes del 2016, qu'ascienden a 45.520.000 euros. L'oxetivu d'estes subvenciones ye impulsar esti sector nel país.

El Gobiernu materializa con estes subvenciones "el so apueste por apurrir un nivel de vida razonable a los profesionales del campu asturianu y asegurar los sos niveles de renta, amás de contribuyir a la modernización de les sos esplotaciones nun contestu de caltenimientu del mediu ambiente y el paisaxe rural". Nesti exerciciu, el segundu d'aplicación de la nueva Política Agraria Común (PAC), les ayudes van suponer pa los ganaderos d'Asturies una importante inyección de lliquidez y van beneficiar a unos 10.900 solicitantes, que van recibir en xunto cerca de 73 millones.

Son ayudes de sofitu a les rentes de llabradores y ganaderos, los denominaos pagos directos de la PAC. A esti fin destínense 32,5 millones en dos anualidaes: 15 con cargu al actual exerciciu y 17,5 con cargu al próximu.

Estes partíes iniciales van ampliase hasta una cantidá añal que va rondar los 60 millones. Ye la principal llinia d'ayuda de la conseyería y ta financiada íntegramente pol Fondu Européu Agrícola de Garantía Agraria (FEAGA).

Los fondos van destinaos a les subvenciones desacoplaes, esto ye, non venceyaes a la producción (como los pagos básico y verde) y a les subvenciones pa la mocedá, mesmo que les ayudes acoplaes o venceyaes a la producción. Estes postreres destínense na so gran mayoría a esplotaciones que caltengan vaques nodrices, de vacunu de cebu, vacunu de lleche, ovín y caprín.

Les ayudes diríxense a los profesionales que cumplan los requisitos de llabrador activu: que seyan titulares d'una esplotación agrícola o ganadera inscrita nel rexistru correspondiente, con independencia del réxime de tenencia de la tierra, y que lleven a cabu una actividá agraria.

Pagos venceyaos al Programa de Desarrollu Rural

L'autorización del Conseyu de Gobiernu inclúi delles llinies, referíes a llabradores y ganaderos, venceyaes al desarrollu rural. Asina, nel marcu del Programa de Desarrollu Rural d'Asturies 2014-2020 y destinaes al sofitu a l'actividá agraria sostenible, asígnense 13.020.000 euros a los pagos compensatorios por producir en zones de monte y n'otres árees con llimitaciones naturales específiques, a l'atención a la producción ecolóxica y a les ayudes agroambientales por una producción ganadera sostenible y de caltenimientu del paisaxe. Estes cuantíes van ser financiaes con cargu al Fondu Européu Agrícola de Desarrollu Rural (FEADER), l'Alministración central y el Gobiernu d'Asturies

Esti añu, al igual que n'exercicios anteriores, les solicitúes podrán realizase hasta'l 30 d'abril nes entidaes bancaries collaboradores, a partir de la fecha de publicación de la convocatoria nel BOPA. El Gobiernu d'Asturies pretende que les compensaciones económiques permitan a llabradores y ganaderos empobinar los sos recursos y esfuerzos pa responder a les demandes de la sociedá.

Son, polo tanto, ayudes equilibraes y acordies cola importancia del serviciu qu'empresten a la sociedá, que pretenden garantizar el suministru alimentariu, en cantidá y calidá. Tamién inciden notablemente na cohesión social de los ámbitos rurales y na salú de los consumidores.

Les últimes reformes de les ayudes de la PAC pal periodu 2015-2020 supunxeron un cambiu sustancial. Agora destínense menos fondos pa intervenir nos mercaos y más pa les ayudes directes a los productores y al desarrollu rural.