Convocaes 330 places na enseñanza asturiana

El Conseyu de Gobiernu d'esti xueves dio'l preste a la mayor ufierta d'emplegu na enseñanza de la historia d'Asturies, según afirmó'l mesmu Principáu. Sicasí, les 330 places que s'ufierten agora y que lleguen dempués de cuatro años ensin convocase oposiciones a primaria, nun son abondo pa los sindicatos mayoritarios de la enseñanza asturiana, SUATEA, CC.OO y UXT, que criticaron la ufierta calificándola de probetaya y perbaxo de les sos reivindicaciones.

Los sindicatos sorrayen qu'existen na enseñanza asturiana cerca de 700 interinos y que dende'l 2003 retiráronse por xubilación alredor de 640 profesores.

En total trátase de 330 places, de les que 115 van ser pa Educación Infantil y setenta pa Primaria, repartiéndose les demás ente les estremaes especialidaes como inglés o educación física. El 6% de les places acútense pa persones con dalgún tipu de minusvalía.