Convocada la inscripción pal troféu de gaita Memorial Remís Ovalle

La Delegación del Festival Intercélticu de Lorient n'Asturies convoca, al traviés de la Sociedá de Festexos d'Uviéu, el troféu de gaita Remís Ovalle, primer pasu pa dir a competir a la ciudá bretona pol preciáu Macallan.

Nesti memorial escuéyense los cuatro gaiteros o gaiteres que dirán a Lorient a representar a Asturies nel conocíu Troféu Macallan, que se disputa nel Festival Intercélticu de Lorient. Nél les gaites asturianes tienen qu'enfrentáse ente elles y con otros cuatro representantes gallegos por algamar el troféu más famosu y que más prestixu da nel mundu de la gaita. P'apuntáse hai que dir a la Oficina d'Información Municipal "El Escorialín" na cai Marqués de Santa Cruz, teléfonu 985227586 o bien na mesma SOF na cai Ildefonso Sánchez del Río, nº 8-1º B, teléfonu 985207658. La fecha tope pa facer la inscripción ye'l 24 de mayu a les 14 hores. La fase eliminatoria va ser el sábadu 29 de mayu nel Auditoriu "Principe Felipe" d'Uviéu a les 19:00 hores, y la fase final de la que va salir el ganador o ganadora del Memorial y los cuatro representantes d'Asturies en Lorient va ser 18 de xunu nel mesmu sitiu.