Convocóse'l Premiu Nacional de Folclore "Martínez Torner"

Esti premiu que convoca'l Conceyu d'Uviéu al traviés de la Escuela Municipal de Música y Danza Tradicional d'Uviéu llega a la so segunda edición dempués de que l'añu pasáu fuere la "Asociación de Gaiteros de Aragón" la que llevare esti reconocimientu que fai alcordanza del musicólogu asturianu.

El Premiu Nacional de Folclore "Martínez Torner"quier facer reconocimientu del méritu de persones físiques, asociaciones o fundaciones que rescamplaren pol so trabayu nel mundu de la música folclórica, danza tradicional, etnomusicoloxía, cultura tradicional o investigación del folclore dientro del ámbitu estatal. El plazu pa presentar les candidatures fina'l próximu 25 de febreru y estes han d'unviase a la Conceyalía d'Educación del Conceyu d'Uviéu que ta asitiada na cai Quintana nº 6. Namás van poder presentar candidatures les asociaciones que tengan la so sede social nel conceyu d'Uviéu, y los miembros del xuráu, arriendes de los profesores de la Escuela de Música Municipal.

Na pasada edición el premiu llevólu l' Asociación de Gaiteros de Aragón, asociación cultural qu'esiste dende 1989 y que tien ente los sos oxetivos la investigación y espardimientu de la cultura tradicional aragonesa, sobremanera no tocante a la música en toles sos estayes, dende la recuperación del repertoriu a la de los instrumentos. Na edición pasada esta asociación ganó penriba de nomes propios que tamién taben presentes nes candidatures, como Alberto Jambrina Leal, Eliseo Parra, Rafael Lorenzo o la Escuela de folclore del País Vascu.